Rekord shifrash nga Covid/ Ministrja Manastirliu: E prisnim një rritje të numrit të rasteve në këtë periudhë

Ditët e fundit kemi parë një rritje të të infektuarve me koronavirus. Sipas ministres së Shëndetësisë, Ogerta Manastirliu më shumë këto raste janë shtuar në qarqet e veriut.
Gjatë takimit me ekipin e epidemiologëve të Tiranës, e cila ka peshën kryesore të vatrave aktive në vend, Manastirliu u shpreh se me më prioritet janë shkollat.
“Kemi një rritje të numrit të infektimeve, në Tiranë kryesisht por edhe në disa qarqe të tjera të vendit, si Durrësi, Lezha, Kukësi, kryesisht qarqet e veriut janë ato të cilat kanë një numër më të rritur të infektimeve, ndaj kemi forcuar kapacitetet. Por ne e prisnim këtë rritje të rasteve dhe për shkak të vjeshtë dimrit, e prandaj kemi forcuar kapacitetet. Përpos rritjes aktuale me 30% të ekipeve të terrenit do të shtojmë edhe 10 ekipe të reja dhe të mund t’ja dalim në këtë sfidë të parë të vjeshtë dimrit. Ndër prioritetet kryesore janë shkollat, mësuesit dhe nxënësit, për të kufizuar përhapjen e infeksionit”, tha Manastirliu.
Ajo u shpreh se në krahasim me muajin qershor testimet janë rritur tre herë.
“Testimet janë rritur me 3 herë krahasuar me muajin Qershor, sigurisht kjo falë punës që epidemiologët kanë bërë, kapaciteteve të shtuara të Instituit të Shëndetit Publik, por edhe punës në terren, sepse ashtu sikurse ne e kemi thënë, testimi pa gjurmimin dhe pa izolimin do të ishte vetëm një hallkë, por nuk do të ishte plotësim rigoroz i strategjisë për kufizimin e përhapjes së infeksionit”, tha Manastirliu.
Ekspertët e shëndetit publik u shprehën se rritja e testimeve po ndodh si rezultat i gjurmimit dhe hetimit epidemiologjik.