“Ronaldo kurrë nuk do ta njolloste historinë me Manchester City apo Barcelona”

Cristiano Ronaldo ka punuar shumë për të krijuar një reputacion si më i madhi i të gjitha kohërave dhe kurrë nuk do ta njolloste këtë histori duke kryer lëvizje të diskutueshme te Manchester City apo Barcelona. E ​thotë këtë ish-shoku i skuadrës së portugezit te Manchester United, Fabio.
Kalimi në “Etihad Stadium” e pesë herë fituesit të “Topit të Artë” u diskutua gjatë verës, sapo u bë e qartë se ai do të largohej nga Juventusi. Fabio beson se spekulimet e tilla u ndezën nga agjenti Jorge Mendes, por nuk kishte asnjë shans që ikona e Manchester United dhe Real Madridit të konsideronte një transferim, që do të dëmtonte reputacionin e tij.
Ish-mbrojtësi i “Djajve të Kuq”, Fabio, i cili luajti përkrah Ronaldos në “Old Trafford” midis viteve 2007 dhe 2009, tha për ESPN: “Nuk mund ta imagjinoja. Kur më thanë, nuk mund ta besoja. Ishte Pedro, që luan këtu (FC Nantes) me mua, i cili më tha: Manchester City është gati ta përmbyllë marrëveshjen me Cristianon. Unë iu përgjigja: Nuk është e mundur. Nuk e besoja në asnjë moment.
Unë nuk e di nëse ishte një veprim i bërë nga Jorge Mendes, menaxheri i tij, për të krijuar diçka, sepse kjo ndodh në ditët e sotme. Thjesht po e them këtë, por nuk kam ndonjë ide. Personalisht nuk besoja në asnjë moment se ai do të shkonte te Manchester City. Nuk e njolloste historinë e bërë te Manchester United. Do të kishte qenë e vështirë për të, që të lunate me Manchester City.
Ronaldo e respekton historinë aq shumë, sa nuk bën kurrë të tilla kapërcime. Po ashtu, jam i sigurt se ai nuk do të luante kurrë te Barcelona. Ai e vlerëson shumë historinë që ka bërë kudo që ka qenë. Cristiano Ronaldo luajti në klubet për të cilat ëndërronte: Manchester, Real Madrid dhe Juventus. Kjo është arsyeja pse unë nuk mendoj se do ta njollosë kurrë historinë e vet në futboll”.