Rrëfen shqiptari që jeton në Bejrut: Po ndodh tmerri, tragjedia nuk mbaron këtu

Arianit Shehu, drejtori i Institutit Nacional Demokratik për Lindjen e Mesme, në një intervistë për klankosova.tv tha se shpërthimi i fuqishëm që ndodhi në Beiurit të Libanit ishte i tmerrshëm.

“Sipas informatave të para, duket që shpërthimi ka ndodhur pas një zjarri në depon e materialeve të rrezikshme, por jo eksplozivë, në depon e portit të Beirutit. Raportet fillestare theksojnë se shkak i këtij shpërthimi ka qenë nitrat amoniumi, i cili ka qenë i deponuar aty. Deri tani është raportuar për më shumë se 75 të vdekur dhe rreth 7,000 të lënduar, por supozohet për shumë më shumë viktima”.

Spitalet e Libanit që po ashtu po përballen me pacientët nga COVID-19 u mbushën me viktimat e këtij shpërthimi tragjik.

“Të gjitha spitalet e Beirutit janë stërmbushur me të lënduar të shpërthimit. Gjithçka në radius prej 2 kilometrave është shkatërruar, dëmtime të rënda janë raportuar në radius prej 12 kilometrave dhe dëme të tjera. Thyerje të xhamave janë raportuar në radius prej 22 kilometrave”.

Por, tragjedia nuk mbaron këtu për popullin e Libanit.

Sipas Shehut, vendi edhe ashtu i rënduar nga aspekti ekonomik, mund të përballet me varfëri pasi u shkatërruan edhe depot e grurit, njofton Klan Kosova.

“Në vazhdim, porti i Beirutit i cili tanimë është dëmtuar rëndë, është porti kryesor për import dhe eksport. Gjithashtu, rezervat shtetërore të grurit që kanë qenë te deponuara afër portit janë shkatërruar duke rrezikuar të dërgojë Libanin në varfëri edhe më të madhe. Libani gjatë muajve të kaluara ka qenë i trazuar nga rënia ekonomike dhe jostabiliteti financiar dhe gjithashtu nga pandemia e COVID-19”.

Shqiptari që ka jetuar në Beirut disa vites është prekur rëndë pasi kishte edhe lidhje emocionale me këtë qytet – më të veçantin në botë, sipas tij.

“Jam i tmerruar sot me shpërthimin në depon e portit të Beirutit. I lutem Zotit sot për popullin stoik të Libanit dhe qytetarëve të Beirutit, si dhe për miqtë dhe kolegët e shumtë të mi atje. Beiruti ka qenë shtëpia ime dhe për të gjithë që kanë jetuar aty, Beiruti gjithmonë do të mbetet qyteti më i veçantë dhe më i bukur në botë”.