Eduart Selami e krahasoi Lulzim Bashën me Ramiz Alinë, duke argumentuar se kreu i ngrirë i Partisë Demokratike nuk po krijon kushtet për një garë të barabartë.
Sipas Selamit, edhe Ramiz Alia bëri gjithçka për një fasadë demokratike.
Ish kreu i PD-së e bëri këtë krahasim pasi numëroi disa nga premtimet e pambajtura të Bashës, që do të garantonin një garë të hapur për kryetar të PD-së.
“Unë mendoj se shmangja është se nuk mund ta përballojë një debat të hapur. Dhe fatkeqësisht më kujton më shumë liderin e fundit komunist, Ramiz Alinë i cili bënte gjithshka dhe të pamundurën për një fasadë demokratike, një pluralizëm mendimi dhe i shmangej asaj që ishte më kryesorja që shqiptarët më në fund e arritën.” – u shpreh Selami në një intervisë për Zërin e Amerikës.
Selami kujton disa nga premtimet e Bashës.
“Patjetër si gjithshka, kjo garë duhet të kishte elementë përmirësimi, por këto fatkeqësisht nuk janë bërë sepse zoti Basha është i interesuar për mbajtjen me çdo kusht të postit të kryetarit, se sa për shëndoshjen dhe ringritjen e PD-ës.
Kjo fillon që nga koha që ishte shumë e shkurtër. Nga fakti që në kushte të tillë kur zoti Basha një herë ngriu si kryetar, tashmë herët e fundit dhe kryetarët e degëve e prezantojnë si kryetar dhe unë them me shaka “Kur është kryetar, atëherë ç’vlerë ka gara?”.
Ana tjetër është mospublikimi i listave dhe ajo çka mua më ka zhgënjyer dhe me shumë është ndrydhja e garës. Më premtoi zoti Basha që debatet do të jenë të hapura, që një pjesë do të ishin të përbashkëta. Unë do të doja që të gjitha të ishin të përbashkëta, me praninë e kamerave, të medias së lirë, pra që të hapemi dhe demoratët e qytetarët të shikonin që vërtetë po ndodh diçka e rëndësishme po ndryshon.” – deklaroi Selami.
