Policia e Selanikut ka arrestuar dy shtetas shqiptarë dhe një shtetas grek, me akuzën e trafikut të drogës. Në bashkëpunim me njëri-tjetrin ata kishin sjellë nga Shqipëria një sasi droge të konsiderueshme, për ta trafikuar në tregun vendas.
Sipas policisë, dy shqiptarët, mashkull e femër me moshë respektivisht 38 dhe 45 vjeç, si dhe greku 27 vjeçar, kishin braktisur një automjet në zonën e Follorinës. Brenda mjetit policia gjeti një sasi droge të llojit kanabis, të ambalazhuar në 35 paketa. Pesha e përgjithshme e drogës ishte 26,5 kilogramë.
Policia sekuestroi veç mjetit ku ndodhej droga, edhe mjetin me të cilin të arrestuarit po udhëtonin në momentin e ndalimit të tyre.
