Sezoni që sapo u mbyll në Turqi nuk shkoi ashtu siç shpresonte Taulant Seferi, pasi klubi i tij Bodrumspor, nuk ia doli që të ngjitej në Superligën turke. Por me paraqitjet që dhuroi në këtë edicion në kategorinë e dytë turke, fati i sulmuesit të Kombëtares shqiptare mund të jetë përsëri shumë shpejt në elitë.
Sipas mediave turke, lojtari i cili në këtë sezon ka shëmuar 16 gola e ka dhënë 7 asiste në 43 ndeshje të luajtura, po monitorohet me interes nga dy klube të Superligës turke, Rizespor dhe Kasimpasha, të cilat kërkojnë përforcime për sezonin e ri. Ai ka edhe një vit kontratë me klubin aktual ndaj për një transferim të mundshëm palët duhet të gjejnë një akord.
Ndërkohë, për Seferin ka shfaqur interes edhe një klub francez, më saktësisht Grenoble, që është pjesë e Ligës 2 dhe synon që në edicionin e ardhshëm të luftojë për t’u kthyer në elitën e futbollit francez.
Seferi ka qenë për disa vite pjesë fikse e ekipit kombëtar shqiptar por humb vendin e tij që pas ndeshjeve të Ligës së Kombeve në vjeshtën e vitit 2024, duke mos u ftuar gjatë kualifikuesve të Botërorit 2026 nga trajneri Silvinjo.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
