Presidenti amerikan, Donald Trump zbuloi nga Shtëpia e Bardhë vendimet e reja lidhur me frenimin e pandemisë së shkaktuar nga përhapja e shpejtë e koronavirusit të ri.
I rrethuar nga Task Forca kundër Covid-19, ai njoftoi se do të angazhojë inxhinierët e ushtrisë për të ndihmuar Nju Jorkun në rritjen e kapacitetit të shtretërve për pacientët e infektuar. Sigurisht, fokusi kryesor i Trump mbetet ekonomia.
“Administrata po punon për të garantuar lehtësi për industritë e prekura dhe biznesin e vogël për të siguruar që vendi të dalë nga kriza me një ekonomi të lulëzuar dhe në rritje”, tha presidenti amerikan.
Presidenti Trump shtoi më tej se Amerika shumë shpejt do ta mposhtë këtë virus dhe sipas tij kjo do të ndodhë shumë më shpejt se sa mendojnë njerëzit.
Por në një dalje publike më herët, kreu i Shtëpisë së Bardhë pranoi se situata nuk është nën kontroll, dhe tha se pandemia në Shtetet e Bashkuara mund të zgjasë deri në muajin korrik ose gusht.
Ndërkohë, administrata e tij po shqyrton dërgimin e çeqeve për amerikanët, në mënyrë që ata të kenë para për të shpenzuar gjatë krizës së koronavirusit. Ky vendim mund të hyjë në fuqi brenda dy javëve.
Sekretari i Thesarit Steve Mnuchin, bëri të ditur shtyrjen e afatit për pagimin e taksave dhe detyrimeve të tjera. Ai tha gjithashtu se individët dhe bizneset mund të shtyjnë pagesat e kredive për 90 ditë, pa interes dhe pa dënime.
