Marrëdhëniet Shqipëri-Greqi kanë hyrë në një fazë të re me akuj të shkrirë dhe me një frymë tjetër ndërveprimi. Këtë e konfirmuan disa javë më parë të dy kryeministrat Rama e Mitsotakis në Tiranë, por shihet edhe në aspekte të tjera të bashkëpunimit dypalësh.
Një prej tyre është edhe ai që ka nisur tashmë për çështjet e shërbimeve kadastrale. Drejtoresha e Përgjithshme e Kadastrës, Lorena Goxhobelli, priti në Tiranë një delegacion nga Greqia, i kryesuar nga zv.ministri për Qeverisjen Digjitale, Konstantinos Kyranakis, zv.ambasadori i Greqisë në Tiranë, Athanasios Astrakas dhe Presidenti i Kadastrës Greke, Stelios Sakaretsios.
Në fokus të takimit ishte shkëmbimi i eksperiencave dhe forcimi i bashkëpunimit për modernizimin e shërbimeve kadastrale, me qëllim ofrimin e shërbimeve të shpejta dhe transparente për qytetarët.
Ndihma greke për shërbimet kadastrale u kërkua nga kryeministri Edi Rama te homologu i tij Kyriakos Mitsotakis. Ky i fundit dërgoi në Shqipëri pikërisht delegacionin e mësipërm, për t’i hapur më tej rrugën thellimit të bashkëpunimit në terma konkretë.
Falë këtij bashkëpunimi që sapo ka nisur, stafi i ASHK do të përfitojë nga homologët grekë trajnim dhe ekspertizë në përdorimin e teknologjive më të avancuara në menaxhimin e të dhënave. Synohet përmirësimi i proceseve për të siguruar shërbime më të shpejta dhe cilësore dhe më shumë lehtësi për qytetarët.
Një tjetër aspekt i rëndësishëm i këtij bashkëpunimi me palën greke në fushën e shërbimeve kadastrale është rritja e transparancës dhe standardizimi i procedurave për një Kadastër moderne. Falë dixhitalizimit dhe përpunimit të shpejtë të aplikimeve, ASHK ka ulur si asnjëherë me parë stokun e madh të dosjeve sidomos në kryeqytet ku aktualisht punohet me aplikimet e vitit 2025. Në këtë drejtim po avancohet edhe me zyrat e tjera të ASHK në qytete të tjera të vendit.
