E qëllimtë apo jo, Edi Rama ka gjithmonë një element për të tërhequr vëmendjen. Rastësisht ose jo, i menduar apo spontan ky element protagonizimi i Ramës, vjen sa herë Kryeministri nuk ka diçka të mirë për të thënë, apo sa herë ato që thuhen për të nuk janë lajme të mira.
Në një moment kur një nga ish-ministrat e tij është akuzuar drejtpërdrejtë për implikim në trafikun ndërkombëtar të drogës, kur Ministri i tij i Brendshëm aktual, deklaron dhe aprovon sot problemet e vendit me trafikun, kur zyrtarë të lartë policie përmenden si të përfshirë në afera të paligjshme, Rama gjen ditën të veshë çitjane.
Nuk dimë nëse ka ndonjë term tjetër për pantallonat që Kryeministri ka zgjedhur të mbaje sot gjatë një takimi në qytetin e Fierit, por me siguri ato nuk janë veshja tipike e një zyrtari e ca më pak e një Kryeministri kudo në botë.
Kujtojmë se Ramës i pëlqen të luajë me veshjet, ashtu si dikur me ngjyrat e çorpeve, ashtu si dje me atletet e kombinuara me kostumin dhe ashtu si sot me brekushet apo çitjanet që ka zgjedhur ‘i kombinojë me këpucë serioze të kostumit.
Për sa kohë Rama kombinon veç rrobat kështu për ne nuk ka asnjë problem, çështja është se mos ky stil kombinimi përdoret edhe për t’u dhënë zgjidhje halleve të shtetit që duhet pranuar se nuk janë pak… / Opinion.al
