Kanë nisur arrestimet e para për vjedhjet e votave. Tre arrestimet në Vlorë dhe dy në Shkodër janë bërë nga policia me akuzën e blerjes së votave. Policia e Shtetit raporton se në orët në vijim priten aksione në disa rrethe të vendit ku strukturat e policisë prej disa ditësh po mbajnë në vëzhgim përfaqësues të disa subjekteve elektorale që dyshohet se po ofrojnë para për blerje votash.
Mësohet se për disa persona janë grumbulluar provat e mjaftueshme që vërtetojnë konsumimin nga ana e tyre të veprës penale të blerjes së votave.
Sipas ndryshimeve të reja në Kodin Penal, shitblerja e votës dënohet në mënyrë taksative nga 1 deri në 7 vite burg. Nuk do të ketë masa ndëshkimore si gjoba, por vetëm burg për ata që do të tentojnë tjetërsimin e vullnetit të lirë të votuesve shqiptarë. Do të dënohet nga 1 deri në 7 vite burg marrësi dhe dhënësi i kartave të identitetit. Shpërdorimi i autoritetit policor për të influencuar në mbështetjen e një partie politike do jetë vepër penale dhe të dënohet deri në 5 vjet burgim.
Përdorimi i të mjeteve publike, veprimtarisë shtetërore apo i burimeve financiare ose njerëzore, për zgjedhje, do dënohet vetëm më burgim, nga 1 deri ne 4 vjet. Po kështu ndryshimet në Kodin Penal parashikojnë ashpërsim të dënimeve për të gjitha veprat e tjera penale në fushën e zgjedhjeve, duke i parashikuar të gjitha si krime.
