Florjan Binaj ka bërë një lëvizje surprizë në skenën publike, duke njoftuar zyrtarisht kandidimin e tij si kandidat i pavarur për Tiranën, me mbështetjen e Partisë Demokratike. Përmes një postimi në rrjete sociale, Binaj ka falënderuar qytetarët për përkrahjen, duke theksuar se kjo garë për të nuk është shaka, por një akt serioz qytetar.
“Falënderim për mbështetjen e jashtëzakonshme. Këtë herë nuk është fjala për humor, por për të luftuar të keqen me votë,” shkruan ai.
Në mesazhin e tij, Binaj nënvizon se nuk e sheh veten si politikan, por si një qytetar që nuk mund të rrijë më në heshtje përballë padrejtësive. Ai shpreh shqetësimin për gjendjen aktuale të vendit dhe fton të gjithë ata që ndihen të zhgënjyer nga politika të bashkohen në këtë nismë.
Postimi i plotë:
“Falënderoj për mbështetjen që i dha kandidimit tim si kandidat i pavarur Partia Demokratike, Shqipëria bëhet dhe Nisma thurrje.
Mbetem i hapur për çdo mbështetje që do të vijë nga forcat opozitare.Dëshiroj mbi të gjitha të falënderoj më mijëra qytetarë të Tiranës, të cilët më kanë inkurajuar këto ditë.
Kjo garë është për ju.
Unë nuk jam politikan, jam qytetar dhe partia ime jeni ju.
Deri më sot kam luftuar padrejtësinë dhe të keqen me humorin dhe artin tim, sot ju ftoj ta luftojmë me votë.
Të dënojmë ata që na vodhën dhe bënë humor me ne.
Ju ftoj të bëjmë bashkë mendjet dhe zemrat kundër pushtetit që po dhunon jetët dhe të ardhmen e fëmijëve tanë”.
