Hetimet e deritanishme të Policisë për tragjedinë që ndodhi në familjen Josifi, në Kombinat të Tiranës, kanë nxjerrë në dritë faktin se vajza e vogël kishte vdekur prej disa muajsh dhe mbahej në shtëpi në sekret të plotë nga nëna dhe motra, e mbështjellë me batanije dhe jorgan në dhomën e saj.
Askush nuk e dinte, askush nuk dyshoi, pasi vizitat ishin të rralla dhe sepse familja ishte bërë çdo ditë e më pak e shoqërueshme me të tjerët. Hetuesit janë përqendruar tek pista e flijimit nëpërmjet refuzimit të ushqimit, ose një vetëhelmim.
Motivet besohet se janë dy, besimi në jetën përtej vdekjes dhe ringjalljen duke shpresuar në një botë më të mirë, të bukur dhe pa probleme, kurse e dyta varfëria, depresioni, zhgënjimi me jetën që bënin dhe pesimizmi që i rrethonte. Kushtet ekonomike, sociale, papunësia dhe rrethana të tjera, mund të kenë ndezur “shkëndijën” përfundimtare.
Zhaneta Josifi dhe Anisa Josifi, nënë e bijë, tashmë janë deklaruar të vdekura, kurse vajza tjetër, Blerta, po mjekohet në Spitalin Psikiatrik prej ditës së djeshme, për shkak të tronditjes së thellë.
Tashmë hetuesit dyshojnë se Anisa Josifi, vajza e cila u gjet e pajetë, kishte ndërruar jetë prej disa kohësh, por mbahej në banesë duke u lyer me vaj dhe uthull, në mënyrë që të mos ndihej era e trupit të dekompozuar.
Burime policore thanë se Blerta Josifi, vajza e mbijetuar, ka deklaruar para hetuesve: “Nuk e keni idenë çfarë kaluam ne për të fituar ringjalljen!”, ndërsa është shprehur se motra e saj kishte 15 muaj që kishte vdekur.
Por këto informacione nuk janë ende zyrtare nëse i referohen vërtetë dëshmisë së 34-vjeçares.
Kunati i Zhaneta Josifit ka treguar se kishte më shumë se dy muaj që nuk kishte parë atë dhe vajzën e saj, Blerta. “I shkova në shtëpi, kërkova Anisën, më tha nuk e lëmë të dalë se nuk ka bërë ditët e Zotit”. Ai shprehet jashtë kamerave se Anisën kishte që nga muaji mars 2019 që nuk e kishte parë.
Pista se nëna dhe dy vajzat ishin anëtare të “Dëshmitarëve të Jehovait” shihet me dyshime, pavarësisht se u gjetën broshura të ndryshme me përmbajtje fetare. Kjo, pasi ky sekt thotë se e konsideron vetëvrasjen si një mëkat, pasi jeta është e dhënë nga Zoti dhe e shenjtë dhe se kush merr jetën e vetë nuk bën pjesë në planet e ringjalljes.
Zyra e medias e “Dëshmitarëve të Johovait” në Tiranë këmbëngul që familja Josifi nuk ishte pjesë e kësaj organizate fetare. Në një reagim për mediat, zëdhënësi për media i kësaj organizate, Arben Lubonja, u shpreh se gruaja dhe dy vajzat nuk janë shoqëruar asnjëherë me Dëshmitarët e Jehovait.
Ish-fqinjët e familjes në Përmet thonë se edhe burri i Zhanetës, Llukan Josifi, është vetëvrarë para 6 vitesh, duke u hedhur nga pallati. Ndoshta ngjarja shokuese e humbjes së kryefamiljarit dhe kushtet e rënduara ekonomike, janë bërë shtysë drejt aktit fatal të tre grave.
Nëna dhe dy vajzat u gjetën rreth orës 19:30 në banesën e tyre pas shqetësimit të vëllait të kryefamiljares se motra nuk po i përgjigjej.
Ndërkohë drejtori i Policisë së Tiranës, Rebani Jaupi në një prononcim për mediat nga vendi i ngjarjes dhe se tek trupat e viktimave nuk ka pasur shenja dhune. Ai u shpreh se janë konstatuar shenja të mosushqyerjes, ndërsa vajzat ishin të arsimuara, por të papuna.
Fqinja: Vinte erë e keqe, e ëma më tha që Anisa po bën ditët e Zotit
Një e afërme që jeton pranë banesës së familjes Josifi, foli e shqetësuar për atë që kishte ndodhur dhe dyshimet që kishte.
“Një vit e gjysmë më parë kanë qenë në një sebep familjar. Anisën kisha që në janar 2019 pa e parë. Kur kam shkuar për vizitë në shtëpi, kam ndjerë erën e keqe, e kanë pyetur çfarë është. E ëma më tha, “Anisa nuk del se po bën ditët e Zotit, era e keqe vjen se nuk duhet të lahet”. Me Jehovain kanë qenë në Përmet, pasi u vetëvra burri u shkëputën dhe tani merren me një sekt tjetër fetar që praktikonin”, tha ajo.
Bashkëshorti i Zhanetës u vetëvra, fqinjët në Përmet: Ishin familje shumë e mirë
Fqinjët e familjes Josifi në Përmet thanë për mediat se edhe aty njiheshin për njerëz të mirë. Sipas tyre, bashkëshorti i Zhanetës para disa vitesh u vetëvra duke u hedhur nga pallati.
Pas kësaj ngjarjeje, gruaja dhe dy vajzat shkuan në Tiranë. “Kjo kishte dy vajza dhe burrin. Bënte tregti, ishte goxha zonjë edhe burri ishte i shkëlqyer, por ishte me një krah. Ai është hedhur nga pallati para 5-6 vitesh. Më pas gruaja mori vajzat dhe iku në Tiranë. Ai burri ishte kryevepër, por edhe gruaja në punën e saj. Ai ndoshta u mërzit që ishte me një krah dhe u vetëvra. Më ka ardhur shumë gjynah. Me Jehovain nuk di gjë të kenë qenë ato”, shprehet një prej banoreve.
“Ishin njerëz shumë të mirë, nuk i bënin kujt keq. Kemi qenë në një lagje dhe kur kemi qenë të vogla me mamanë e saj luanim. I ati u hodh nga kati i katërt. Ishin shumë të mira. Ajo merrej fillimisht me tregti këtu, shisnin tek tregu”, u shpreh një tjetër fqinje.
Dëshmia tronditëse: “E pyesja se ku është Anisa, më thoshte….”
Një tjetër dëshmi trondistëse vjen nga një banore e pallatit ku jetonte Zhaneta Josifi me dy vajzat. Ajo thotë se ato kishin kohë që nuk dilnin nga banesa, ndërsa nuk pranon as persona të afërm.
“Kishim hyrje dalje, muhabet. Unë shkova në Greqi, kur u ktheva i vete dhe i them, ku e ke Anisën ? Fle gjumë tha. Shikoja nga dritarja dhe nuk dilnin, edhe dy lule që kishin aty po i thaheshin. I vete Zhanetës dhe i them, ku e ke Anisën, apo e ke në Gjermani. Vuri buzën në gaz dhe më tha: jo e kam këtu. Dy vjet unë as Blertën dhe as Anisën nuk i kam parë më.
Momenti i fundit që kam parë Zhanetën ka qenë në mars. E pashë në supermarket poshtë dhe një ditë kur erdhi policia dhe bashkia që i sollën ushqime. I vajta para një muaj, i rashë derës. Lina më tha, të lutem shumë largohu nga shtëpia ime dhe mos ta pafsha bojën. Vinin edhe të afërmit, por nuk i pranonte”, u shpreh banorja.
Zyra e “Dëshmitarëve të Jehovait”: Familja Josifi nuk ishte pjesë e organizatës, jetën e çmojmë si gjënë më të shtrenjtë”
Zyra e Publikut të “Dëshmitarëve e Johovait” në Tiranë reaguan pas lajmeve në media se nëna dhe dy vajzat e familjes Josifi ishin anëtare të këtij sekti fetar. Por ata e mohuan, duke u shprehur se asnjë nga familja Josifi nuk ishte pejsë e kësaj organizate.
Në një reagim për mediat, zëdhënësi për media i kësaj organizate, Arben Lubonja, tha se gruaja dhe dy vajzat nuk janë shoqëruar asnjëherë me “Dëshmitarët e Jehovait”.
“Jemi shumë të tronditur nga lajmi i bërë publik dje në media shqiptare për humbjen e jetës në familjen Josifi. Lajmi na hidhëron dhe u shprehim ngushëllimet tona familjarëve që kanë humbur njerëzit e tyre të afërm. Pjesëtarët e familjes Josifi jo vetëm që nuk kanë qenë pjesëtarë të organizatës sonë, por as nuk janë shoqëruar ndonjëherë me “Dëshmitarët e Jehovait”.
“Dëshmitarët e Jehovait” kanë pikëpamjen e Zotit për jetën dhe e çmojnë atë si gjënë më të shtrenjtë. vetëvrasja me pretendimin për të shkuar në një jetë më të mirë nuk përputhet me asnjë mënyrë me besimin e tonë”, thuhet në deklaratë.
Në fakt, kjo organizatë predikon vërtetë jetën pas vdekjes nëpërmjet ringjalljes në parajsë, por gjithashtu predikon kundër vetëvrasjes, pasi jeta është e shenjtë dhe Zoti e cilëson si një mëkat. Për më tepër që sipas predikimit, kush i merr jetën vetes, atëherë bën mëkat dhe nuk mund të fitojë ringjalljen. Ndaj dyshohet se ndoshta nëna dhe vajzat kanë patur të tjera arsye për veprimet që i çuan drejt një fundi fatal.
