Stadiumi qendror “Arthur Ashe” ishte mbushur të dielën me 23 mijë spektatorë, të cilët shpresonin të shihnin një tenist vendas të fitonte për herë të parë pas 23 vitesh. Por u përballën me një realitet të hidhur, pasi Alexander Zverev është shumë më i mirë se Ben Shelton.
Këtë e tregon rezultati i finales 3-1 (6-3, 7-6, 5-7 dhe 6-2), takim që zgjati 3 orë e 36 minuta, por edhe statistikat para ndeshjes. Pesë përballjet e mëparshme mes tyre kishin përfunduar me fitoren e gjermanit, i cili kishte fituar radhazi 10 sete. Falë triumfit në qershor në fushat e dheut në “Roland Garros”, Zverev është një tjetër lojtar, ai vjen më i çliruar dhe me më pak presion mbi supe.
Në një situatë të tillë, vështirë se gjermani do ta kishte humbur finalen e Nju Jorkut të vitit 2020 ndaj Dominic Thiem, pasi atëherë kishte fituar dy setet e para. Fituesi ishte aq i tensionuar, saqë nuk e kuptoi menjëherë se kishte fituar kundër Shelton. Pas pikës që i dha lojën e tetë të setit të katërt, ai u përgatit të rikthehej në lojë si pritës. Vetëm zhurma e jashtëzakonshme e publikut e bëri të kuptonte se ndeshja kishte përfunduar dhe se titulli ishte i tij.
Që nga Andy Roddick në vitin 2003, asnjë amerikan nuk i është afruar seriozisht ngritjes së trofeut. Nuk ia dolën as Andre Agassi dhe Roddick në edicionet e viteve 2005 dhe 2006, kur u mposhtën nga Roger Federer. Po kështu, Taylor Fritz humbi finalen dy edicione më parë ndaj Jannik Sinner. Kanë kaluar 8.407 ditë nga triumfi i Andy Roddick dhe, me sa duket, do të kalojnë edhe shumë të tjera. Shelton humbi që në fillim edhe armën e tij më të fortë: shërbimin e parë. Nëse nuk ishte i besueshëm me goditjen e tij më të mirë, nuk kishte shumë për të bërë.
Në gjysmëfinale, kundër bashkëkombësit Frances Tiafoe, ai kishte regjistruar shërbimin më të shpejtë në historinë e turneve Grand Slam. Por nervozizmi i një finaleje të madhe është diçka krejt tjetër. Ishte duke paguar çmimin e mungesës së përvojës në këto nivele. Nga ana tjetër, Sascha, ashtu si pothuajse i gjithë qarku i tenisit për meshkuj, e njeh mirë dobësinë e amerikanit nga Atlanta në goditjen me “backhand”. Pikërisht në atë anë gjermani e sulmonte vazhdimisht.
Zhurma, tashmë shurdhuese në stadiumin qendror të Qendrës së Tenisit “Billie Jean King”, ishte disi më e përballueshme falë faktit që shiu pushoi përkohësisht dhe ndeshja mund të zhvillohej me çatinë e hapur. Askush nuk ka fituar më shumë ndeshje se Zverev në vitin 2026: plot 53, prej të cilave 25 në turnetë “major”. Ai bëhet tenisti i dhjetë që arrin ta justifikojë statusin e favoritit numër një të turneut në epokën “Open”, që prej vitit 1968.
Fitimi i “tie-break”-ut në setin e dytë e përshpejtoi ndjeshëm rrjedhën drejt fundit, pavarësisht se Shelton u largua për pak kohë në dhomat e zhveshjes. Është e vështirë të fitosh një finale kur nuk krijon asnjë mundësi për “break” deri në 2 orë e 19 minuta lojë. Ben, inferior në lojën nga fundi i fushës, kaloi në sulm total, duke u ngjitur vazhdimisht në rrjetë. Taktika e re i dha rezultat, sepse kundërshtari filloi të ndjente presionin dhe atë që në tenis njihet si frika e skenës së madhe. Në tenis duhet të marrësh iniciativën, ndërsa lojtari nga Hamburgu nuk po ofronte asgjë. Por, një “break” i parë në fillim të setit të katërt e ndihmoi Zverevin të qetësonte nervat, ndërsa amerikani kishte mbetur pa pa energji. Kështu gjithçka u mbyll me festën e gjermanit Zverev, i cili ngriti lart për herë të parë në karrierë trofeun e “US Open” dhe titullin e dytë Grand Slam.
Suksesi i fundit i përket 23 viteve më parë, kur Andy Roddick ngrinte trofeun prestigjioz.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
