Ted Turner, biznesmeni dhe filantropi amerikan që themeloi CNN, është ndarë nga jeta në moshën 87-vjeçare. Lajmi u konfirmua nga Turner Enterprises, duke bërë të ditur se ai u shua i qetë, i rrethuar nga familja.
I lindur në Ohio dhe i rritur në Atlanta, Turner u bë një nga figurat më të fuqishme të medias, duke ndërtuar një perandori që përfshinte kanale televizive, sport dhe argëtim. Ai ishte njeriu që solli për herë të parë konceptin e lajmeve 24 orë në ditë, duke lançuar CNN më 1 qershor 1980, një hap që ndryshoi përgjithmonë mënyrën se si informohet bota.
Përveç suksesit në media, Turner ishte edhe një filantrop i njohur, themelues i United Nations Foundation dhe aktivist për çështje globale si çarmatimi bërthamor dhe mbrojtja e mjedisit. Ai luajti një rol të rëndësishëm edhe në rikthimin e bizonëve në natyrën amerikane.
Në vitin 1991, ai u shpall “Njeriu i Vitit” nga revista Time, për ndikimin e tij në mënyrën se si njerëzit në mbarë botën përjetojnë ngjarjet në kohë reale.
Megjithëse më vonë shiti rrjetet e tij tek Time Warner, Turner e konsideronte CNN si arritjen më të madhe të jetës së tij.
Ai lë pas pesë fëmijë, 14 nipër e mbesa dhe dy stërnipër, ndërsa trashëgimia e tij në botën e medias dhe më gjerë mbetet e pakrahasueshme.
