Deputeti i Partisë Mundësia, Erald Kapri, komentoi në emisionin “Kjo Javë” në News 24 zgjedhjet e ardhshme për Bashkinë Tiranë, teksa deri tani vetmi fakt, është emri i Ogera Manastirliut si kandidate e PS për të marrë drejtimin e bashkisë së kryeqytetit.
Opozita ende s’ka marrë një vendim se kush do garojë ndërsa Erald Kapri shprehet se duhet të jetë një kandidat apolitik, një person i cili të mos ia hapë telefonin as Berishës dhe as Shehajt.
Sipas tij, emri i Ogerta Manastirliut nuk është gjë tjetër veçse për t’i shërbyer pushtetit të Edi Ramës. Kapri shprehet se opozita duhet të bëjë të kundërtën.
“Rama menjëherë shpalli kandidaten e PS, Ogerta Manastirliu. Mënyra si e bëri është e qartë: Manastirliu do i shërbejë pushtetit të Ramës nesër.
Opozita duhet të bëjë të kundërtën. Tiranës i duhet një kryebashkiak që jeton për qytetin, mundësisht një njeri apolitik, i besueshëm dhe jo i korruptuar. Një njeri që, edhe nëse fiton nesër, të mos ia hapë telefonin as Sali Berishës e as Agron Shehajt.
Kemi biznesin, ligjin, pedagogjinë brenda dhe jashtë vendit. Pse të mos kërkojmë aty një model të mirë për qytetarët e Tiranës? Kryebashkiaku i Prishtinës ishte një arkitekt në Londër. Është e vështirë të gjejmë një kandidat të tillë ne?”-tha Kapri.
