Oltion Çaçi do të jetë kandidati i Partisë Socialiste për Bashkinë Sarandë. Vendimit, i cili pritet për tu bërë publik pas mbledhjes së Kryesisë së PS. Me origjinë nga Dragoti i Tepelenës, Oltion Çaçi është një biznesmen dhe sipërmarrës në fushën e hotelerisë.
Ai ka lindur në vitin 1980. Ka përfunduar studimet e larta në Kiev, Ukrainë, në Institutin e Marrëdhënieve Ndërkombëtare, të Universitetit Kombëtar Taras Shevchenko. Më pas ka vazhduar specializimin në të Drejtën Ndërkombëtare Publike në Kiev. Çaçi ka një përvojë 15 vjeçare në industrinë e turizmit. Ai shërbeu si Kryetar i Sektorit të Hotelerisë në Unionin Turistik Shqiptar, duke treguar përkushtim për të promovuar turizmin dhe zhvillimin ekonomik në rajon.
Mes strukturave të PS-së në Sarandë ka pasur kundërshtime për përzgjedhjen që bëri drejtuesi politik, Blendi Klosi. Megjithatë duket se me miratimin final në Kryesinë e PS-së, kandidatura e Çaçit bëhet fakt i kryer dhe nuk ngelet gjë tjetër veçse të vijojë fushata. Duhet pritur ndërkohë edhe një reagim nga Adrian Gurma, kryebashkiaku që duket se s’ka bindur Klosin e mandej Ramën për të qenë sërish në krye të garës për Sarandën.
