Aventura e Luftëtarit në Ligën e Europës pritej të ishte ëndërr europiane, por në fakt u shndërrua në një makth, ku përveç humbjes turpëruese, nisën edhe akuzat për ndeshje të dyshuar.
Një ndër lojtarët që spikati në dy ndeshjet e Ventspilsit me Luftëtarin, ishte Adeleki Akinjemi i cili në dy takime, arriti të shënonte plot 6 gola ndaj gjirokastritëve, duke rënë menjëherë në sytë e menaxherëve të huaj. Pasi u “zbulua” ky talent, u mësua se Skënderbeu e ka pasur në provë, por duke qenë se nuk kishte bindur, e kishin larguar nga skuadra.
Këtë radhë, janë vetë korçarët ata të cilët kanë ofruar 300 mijë euro për talentin e Ventspilsit. Lajmi u konfirmua nga vetë presidenti i Ventpsilsit që shprehet se korçarët kanë ofruar 300 mijë euro vetëm pak ditë më parë, por oferta është hedhur poshtë nga ai. Aktualisht, Akinjemi luan në kampuionatin norvegjez me skuadrën IK Start, aty ku aktivizohet edhe Herolind Shala.
“Për Akinjemin e di që kishte shumë oferta dhe unë prisja që ta shisja me të paktën 1 milion e gjysmë. Norvegjia ishte një ndër destinacionet më të mundshme për lojtarin, por edhe Skënderbeu i Korçës kishte bërë një ofertë 300 mijë euro. Unë vetë i thash klubit shqiptar, se ajo ofertë nuk na interesonte aspak”, u shpreh presidenti i Ventspilsit.
