Nga Fatjon Baze
Futbolli shqiptar është prekur sërish nga një sëmundje që mesa duket nuk ka ndërmend që të shërhohet: trukimet e ndeshjeve.
Estrada e turpshme që skuadra e Luftëtarit bëri në prezantim e saj të parë në Kupat e Europës, po rezulton një njollë e zezë për klubin pasi tashmë ata janë zyrtarisht nën hetim nga UEFA për trukime.
Dhe e verteta në fakt nuk ka pse të fshihet: Ka apo nuk ka fakte UEFA, ajo ndeshje nuk ka asnjë dyshim që ishte e trukuar.
“Bluzinjtë” bën një paraqitje të shëmtuar në dy takimet e zhvilluara me skuadrën e Ventspils ku përveç pësimit të tetë golave në të dyja ndeshjet, ato takime shfaqën sërish plagën e rëndë që vuan futbolli shqiptar: trukimin e ndeshjeve në sy të të gjithëve.
Ata shitën ndeshjen; shiten fanellën; shitën historinë; shitën qytetin; shitën tifozët të cilët pavarsisht padrejtësive që iu bënë nga klubi duke i turpëruar, u distancuan menjëherë nga ato skena të turpshme duke mos i kursyer as akuzat në drejtim të presidencës për trukimin e ndeshjes.
Për çdo skuadër në Superiore që ka pretendime synimi i parë që mund të jetë një objektiv i arritshëm janë sigurimi për një vend që të dërgon në Kupat e Europës, por kjo gjë po na tregon mentalitetin që kanë skuadrat shqiptare në të tilla kompeticione, të cilin nuk e shohin si një mundësi për tu rritur dhe për përfituar para në mënyrë të ndershme, por e shohin si një thesar për të fituar para të pista.
Luftëtari i trukimeve nuk është i nevojshëm për asnjërin në Gjirokastër, por vetëm për ata që përfitojnë para në mënyra të pista nën fanellën dhe emrin e klubit të qytetit.
Gjirokastrës dhe të gjithëve u duhet një Luftëtar i vërtet si ai i sezonit ku shkruan historinë duke marrë pjesë për herë të parë në Europë.
Nuk i duhet ky klub ku presidenti Tavo e ka çuar ekipin në buzë të greminës duke krijuar borxhe të mëdha si dhe duke mos paguar prej muajsh lojtarët dhe pa pikën e turpit së bashku me presidentin e FSHF-së, Armand Duka “zgërdhiheshin” në mbledhjen e Ligës së Profesionistëve.
Më poshtë video e takimit të zhvilluar në “Elbasan Arena” mes Luftëtarit dhe Ventspils që po hetohet nga UEFA si e trukuar./TemA
