Pas përfundimit të procesit të konstituimeve të këshillave të reja bashkiake të dala nga zgjedhjet e 14 majit, pritet që javën e ardhshme të mblidhet edhe Këshilli i Qarkut Gjirokastër. Në një kohë kur të gjitha bashkitë i kanë zgjedhur përfaqësuesit e tyre në këtë organ, mbetet vetëm të zgjidhet drejtuesi i ri që do të pasojë Lindita Rovën.
Edhe pse kryetari i ri i Këshillit të Qarkut do të hidhet në votim, duket se socialistët të cilët kanë 6 nga 7 bashkitë e qarkut, do të shkojnë me një emër të përbashkët. Siç mëson argjiroja.net kandidatura më e mundshme pritet të jetë Dino Selimi, përfaqësues i Këshilit Bashkiak Tepelenë.
Megjithatë do duhet pritur mbledhja dhe votëbesimi nga anëtarët e tjerë të këshillit për zyrtarizimin e tij si kryetar. Deri më tani Dino Selimi mban postin e drejtorit rajonal të Inspektoriatit Kombëtar të Mbrojtjes së Territorit. Ai është gjithashtu edhe kryetar i Partisë Socialiste në Tepelenë. Në vitin 2013 kur socialistët erdhën në pushtet, Selimi u emërua në krye të drejtorisë rajonale të Shërbimeve të Transportit Rrugor Gjirokastër, e njohur ndryshe edhe si drejtoria e patentave.
Në vitin 2018 ai u emërua në postin e Kryeinspektorit të Mjedisit Gjirokastër. Nënkryetari i Këshillit të Qarkut Gjirokastër pritet të zgjidhet një përfaqësues i Bashkisë Dropull, ndërsa në postin e Sekretarit të Përgjithshëm nuk pritet të ketë ndryshime pasi do të vijojë detyrën Arnisa Hide Ibrahimi nga Bashkia Libohovë.©argjiroja.net
