Sot u bë ndryshimi sezonal i orës, një praktikë që përsëritet çdo gjashtë muaj në shumë vende të botës. Këtë herë, orët u kthyen një orë pas, duke na dhënë një orë shtesë gjumë. Megjithatë, ekspertët paralajmërojnë se edhe ky ndryshim në dukje i favorshëm, ndikon në ritmet biologjike të trupit dhe kërkon disa ditë për t’u përthithur plotësisht.
Sipas specialistëve të gjumit, ora jonë biologjike është shumë më e ndjeshme sesa një mekanizëm apo aplikacion telefoni. Ndryshimi i menjëhershëm i orarit të dritës dhe errësirës mund të shkaktojë lodhje, ulje përqendrimi dhe ndryshime humori, sidomos tek fëmijët dhe të moshuarit.
Kjo temë është objekt debati të gjatë në Bashkimin Evropian, ku shumë vende dhe qytetarë kërkojnë heqjen përfundimtare të ndryshimit të orës. Që prej vitit 2018, Komisioni Evropian ka propozuar që çdo shtet të zgjedhë nëse do të mbetet përgjithmonë me orën dimërore apo verore, duke i dhënë fund kalimit gjashtëmujor. Propozimi u mbështet nga 84% e qytetarëve që morën pjesë në një konsultim publik me 4.6 milionë përgjigje, shumica prej të cilëve ishin kundër ndryshimit të orës.
Megjithatë, vendimi përfundimtar ende nuk është miratuar, pasi kërkon konsensus si nga Këshilli Evropian, ashtu edhe nga Parlamenti Evropian. Deri atëherë, ndryshimi i orës do të vazhdojë të zbatohet, duke na dhënë një orë më shumë gjumë këtë tetor, por edhe një kujtesë se edhe ora biologjike ka nevojë për kohën e saj për t’u rregulluar.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
