Hetimet për kryebashkiakun e Bulqizës, Lefter Alla, kanë hyrë në një fazë të verifikimit të autetincitetit të videos, ku pretendohet se konsumon lëndë narkotike. Vetëm 24 orë pas çeljes së këtij hetimi, prokurorët e çështjes kanë kërkuar ekspertimin grafik të videos tashmë të sekuestruar. Ekspertimi do kryhet nga ekspertët e laboratorit të policisë shkencore në Ministrinë e Brendshme.
Nëpërmjet kësaj ekspertize prokuroria synon të provojë qartësisht dhe me anën e një ekspertize nëse personi që shfaqet me shpinë në video, është ose jo Lefter Alla. Ndërsa një tjetër hap shumë i rëndësishëm për zbardhjen e kësaj çështje, është se Prokuroria e Posaçme Kundër Korrupsionit dhe Krimit të Organizuar, i ka kërkuar kryebashkiakut Alla, t’i nënshtrohet testit të drogës. Për të kryer këtë procedurë, Alla duhet të paraqitet e Institutin e Mjekësisë Ligjore, për ti marrë kampion gjaku dhe urine, me qëllim kryerjen e eskpertimit mjeko-ligjor, që do të vërtetojë nëse Alla është konsumues droge ose jo. Kjo ekspertizë do të jetë baza e kësaj çështje penale dhe që mund të shtyjë prokurorët të ngrenë akuzë për kryebashkiakun e Bulqizës Lefter Alla.
Në një postim në rrjetet sociale, Alla sqaron se ka qenë në dijeni për ekzistencën e një video-montazhi thotë ai, që prej një viti. “Dua të sqaroj gjithashtu se ekzistenca e një video-montazhi më është bërë me dije prej rreth një viti, por gjithmonë kam besuar dhe besoj se duhet të jetë drejtësia ajo që ta hetojë dhe ta zbardhë”. “Kushdo që më akuzon mua të presë veprimet e Prokurorisë dhe vendimin përkatës të Gjykatës”- thotë Alla.
