Struktura e Posaçme Kundër Korrupsionit dhe Krimit të Organizuar ka vendosur të shtyjë deri të martën, 24 qershor 2025, afatin për nisjen e procedurave për përzgjedhjen e kreut të ri të Byrosë Kombëtare të Hetimit. Kjo shtyrje vjen për shkak të problemeve me dokumentacionin e kandidatëve, ku nga 13 aplikantë në total, vetëm dy kanë dorëzuar të gjithë dokumentet e kërkuara në mënyrë të rregullt për fazën e parë të përzgjedhjes.
Komisioni i Posaçëm i ngritur pranë SPAK do të kalojë më pas në fazën e intervistimit dhe vlerësimit të kandidatëve, për të përzgjedhur kandidatët që kalojnë në fazën tjetër.
Ndër emrat më të njohur që kanë shprehur interes për drejtimin e BKH-së janë ish-drejtuesit e Policisë së Shtetit, Haki Çako dhe Gledis Nano, zëvendësdrejtori aktual i BKH-së, Joni Keta, si dhe prokurori Andi Pogace.
Procesi i përzgjedhjes së kreut të ri është hapur pas përfundimit të mandatit të drejtoreshës së parë të BKH-së, Aida Hajnaj, më 31 gusht 2024. Sipas ligjit, drejtuesi i Byrosë emërohet për një mandat pesëvjeçar.
Byroja Kombëtare e Hetimit është një strukturë hetimore e dalë nga drejtësia e re, e ndërtuar mbi modelin e FBI-së amerikane, dhe ka për mision mbështetjen e SPAK në hetimin e korrupsionit, pastrimit të parave dhe grupeve kriminale.
13 kandidatët në garë janë:
Andi Pogaçe
Artur Beu
Astrit Halilaj
Elton Kërluku
Gentian Ndoi
Gentjan Shehaj
Gledis Nano
Haki Çako
Joni Keta
Maoricio Sheldija
Marinela Pilinçi
Miklovan Kanani
Nevrus Ndregjoni
