Janë shpallur fituesit e Çmimeve të Filmit BAFTA 2026, që vlerësojnë arritjet më të mira kinematografike të 12 muajve të fundit, në një mbrëmje të mbushur me emocione dhe surpriza.
Filmi “One Battle After Another” ishte protagonisti absolut i ceremonisë, duke fituar gjashtë çmime, përfshirë Filmin më të Mirë, Regjisorin më të Mirë për Paul Thomas Anderson, Skenarin e Adaptuar, Kinematografinë, Montazhin dhe çmimin për Aktorin Dytësor për Sean Penn.
Pas tij u renditën “I Swear”, “Sinners” dhe “Frankenstein”, me nga tre çmime secili, ndërsa “Hamnet” fitoi dy çmime të rëndësishme, përfshirë Filmin më të Mirë Britanik dhe Aktoren Kryesore për Jessie Buckley.
Në kategoritë e aktrimit, Robert Aramayo u shpall Aktori Kryesor më i Mirë për rolin në “I Swear”, ndërsa Wunmi Mosaku fitoi çmimin për Aktoren Dytësore për “Sinners”. Aramayo u vlerësua gjithashtu me çmimin “Rising Star”, i votuar nga publiku.
“Sinners” fitoi edhe për Skenarin Origjinal dhe Muzikën Origjinale (Ludwig Göransson), ndërsa “Frankenstein” dominoi në kategoritë teknike si Dizajni i Kostumeve, Skenografia dhe Grimi & Flokët.
Në kategorinë e Filmit më të Mirë Jo në Gjuhën Angleze triumfoi “Sentimental Value”, ndërsa “Zootropolis 2” u shpall Filmi më i Mirë i Animuar. Çmimin për Dokumentarin më të Mirë e fitoi “Mr Nobody Against Putin”.
Një vlerësim i veçantë për Kontribut të Jashtëzakonshëm Britanik në Kinematografi iu dha Claire Binns, për rolin e saj në industrinë e filmit britanik.
Ceremonia e këtij viti konfirmoi edhe një herë diversitetin dhe forcën krijuese të kinemasë bashkëkohore.
