Me aparatin fotografik në duar ai shoqëron lëvizjet e lojtarëve në fushën e blertë për të fiksuar çdo moment të veçantë të ndeshjes. Prej më shumë se 30 vitesh fotografi Gëzim Beqiri, fikson imazhet e skuadrës së Luftëtarit.
“Profesionin e fotografit e kam nisur në fillim të viteve ’70-të ndërsa punoja në gazetat lokale në Gjirokastër. Që prej atyre viteve nuk e kam ndarë aparatin fotografik nga dora, duke përfshirë sportin dhe veçanërisht futbollin”, kujton Gëzimi hapat e parë në këtë profesion. Në atë periudhë ai punonte si fotoreporter në gazetën “Pararoja” e cila publikohej në Gjirokastër. Krahas ilustrimit me fotografi të artikujve të ndryshëm Gëzimi ndiqte edhe ndeshjet e ekipeve të “Luftëtarit” në sporte të ndryshme.
“Me kalimin e kohës nisi të më tërhiqnin imazhet nga sporti dhe këto lloj fotografish ishin të preferuarat e mia. Gjithashtu nisa të krijoj edhe arkivin për ekipin e Luftëtarit i cili me kalimin e viteve u pasurua me fotografi nga futbolli, basketbolli, shahu apo sporte të tjera
të cilat ishin në ato vite në Gjirokastër”, thotë Gëzimi. Do të ishte ky pasion dhe vullneti tij për fotografinë që bënë që në vitin 1976 të zinte vendin e parë në një konkurs fotografie në rang kombëtar, madje fotot e tij nisën të publikoheshin në revistat me emër që botoheshin në vendin tonë. I paharruar për të ka ngelur viti 1978 kur “Luftëtari” u shpall nënkampioni i
Shqipërisë në futboll, rezultat i cili nuk është përsëritur asnjëherë për futbollin gjirokastrit.
“Ishte diçka e veçantë për qytetin dhe unë lëvizja me aparat në dorë për të fiksuar gëzimin e sportistëve dhe tifozëve ”, kujton fotografi gjirokastrit. Pa e fshehur modestinë ai thotë se gjatë punës së tij nuk ka çuar dëm asnjë film fotografik, pasi duke qenë se i kishin me kursim duhej të tregohej i kujdesshëm në përdorimin e tyre. Pas viteve ’90-të shumë sporte në Gjirokastër u shpërbënë, periudhë të cilën fotografi e kujton me dhembje. Kujtim i atyre viteve ngelet edhe linja për larjen dhe stampimin e fotografive të cilën ai e mban ende në shtëpi si një relike të fotografisë tradicionale.
“Me këtë linjë dhe solucionet e stampimit të filmave me lidhin me dhjetëra kujtime, dhjetëra ndeshje dhe emra futbollistësh si Braho, Seiti, Boni, Kalluci, e shumë të tjerë”, shprehet Gëzimi. Megjithëse ka ushtruar disa profesione sërish Gëzimi nuk ka hequr dorë nga fotografia sportive. “Këtë kampionat “Luftëtari” luan në Superligë dhe unë ndjej një emocion të veçantë ndërsa skuadra është rikthyer sërish në elitën e futbollit të vendit tonë. Jam i pranishëm në çdo ndeshje për të fiksuar me aparatin fotografik imazhe të lojës së skuadrës në fushën e blertë. Besoj se ekipi shumë shpejt do të përsërisë suksesin e viteve ’70-të”, shprehet plot emocion fotografi gjirokastrit./konica.al
