Në episodin më të fundit të “Goca dhe Gra”, një diskutim i zakonshëm u shndërrua në një debat të hapur mes Ermal Mamaqit dhe aktores Ema Andrea, duke tërhequr vëmendjen e publikut dhe të gjithë panelit. Shkak u bë seminari motivues që Mamaqi do të zhvillojë këtë fundjavë, për të cilin ai dha disa detaje gjatë bisedës në studio.
Mamaqi shpjegoi se trajnimi dyditor synon t’u japë pjesëmarrësve mjete praktike për të përmirësuar jetën e tyre, duke theksuar se aty do të marrin pjesë edhe emra të njohur të showbizit.
“Të shtunë dhe të diel kam një trajnim. Vijnë shumë personazhe VIP. Do më dëgjosh dy ditë dhe unë do të tregoj se çfarë mund të bësh më mirë me jetën tënde,”- u shpreh ai, duke ia drejtuar fjalën edhe Ema Andreas, e cila ndodhej në panel.
Por reagimi i aktores ishte i menjëhershëm dhe i prerë:
“Me thënë të drejtën, tani e kuptova pse je në këtë situatë, ku je i bindur se çdo gjë që thua do t’u shërbejë të gjithëve. Çfarë bëj në jetë e kam zgjedhur vetë, dhe jam e suksesshme me këtë që kam zgjedhur. Kam gjëra më të rëndësishme për të bërë,” -deklaroi Andrea.
Pas debatit të ashpër në studio, vëmendjen e rrjeteve sociale e mori një postim i aktores Egla Ceno, i cili nga shumë ndjekës u interpretua si një kunjë e tërthortë ndaj Emas. Kjo solli reagime të shumta, duke shtuar edhe më shumë kuriozitet mbi marrëdhëniet mes artisteve.
E kontaktuar nga moderatori Ronaldo Sharka për “Live From Tirana”, Egla Ceno dha një sqarim, duke mohuar që postimi të ishte drejtuar një personi të caktuar:
“Nuk ka lidhje me emra, ka lidhje me qenien njerëzore. Të kujtoj një letër që Anthony Hopkins i shkroi kolegut të tij Bryan Cranston… aty e gjen përgjigjen. Vetëm një njeri i plotësuar mund të përkulet me dashuri para talentit të dikujt tjetër. Kështu njihen të mëdhenjtë nga fjalët që ngrejnë, jo ato që ulin. Të tjerët vijnë sipas radhës. Poshtë.”
Nga ana tjetër, e kontaktuar live nga “Live From Tirana”, Ema Andrea nuk preferoi të jepte komente të mëtejshme pas debatit dhe spekulimeve që po qarkullojnë. Aktorja mbylli telefonatën, duke lënë të paqartë nëse do të reagojë më vonë për situatën.
