Dy ditë më parë kryeministri Edi Rama foli për shqiptarët e bllokuar në kufi, kryesisht me Greqinë. Ai tha se kush merr rrugën për t’u kthyer në Shqipëri, por ka leje qëndrimi në vendin prej nga vjen, nuk do të lejohet të futet në territonin shqiptar. Ndërsa të tjerët që janë pa leje qëndrimi, do të vetëkarantinohen në hotele me shpenzimet e tyre për 14 ditë. Përsa i përket emigrantëve që kthehen nga Greqia, janë përcaktuar dy qytete ku do të karantinohen të kthyerit; Gjirokastra dhe Korca.
Praktikisht janë dy qytetet që kanë pikat kufitare më të më kryesore me Greqinë. Argjirolajm.net mëson se në Gjirokastër janë bërë gati tashmë dy hotele përgjatë rrugës nacionale, që do të strehojnë për 14 ditë emigrantët që vijnë përmes pikës kufitare të Kakavijës.
Deri më tani Gjirokastra është një ndër qarqet, bashkë me Dibrën, që s’kane asnjë rast të prekur me koronavirus. Por pritja e emigrantëve që vijnë nga vendet e ‘zonës së kuqe’, praktikisht e ekspozon më shumë Gjirokastrën si një vatër e mundshme e Covid-19. Megjithatë të mos bëjmë kasandrën dhe le të shpresojmë se kjo situatë do të mbarojë sa më shpejt. Dhe jo kushdo që ka një historik udhëtimi në Greqi mund të jetë bartës i Covid-19.
©argjiroja.net
