“Sulmet në Iran s’e ndalën programin bërthamor”, Pentagoni “përgënjeshtron” deklaratën e Trump

Sulmet e SHBA-ve ndaj centraleve bërthamore të Iranit nuk e shkatërruan programin bërthamor të vendit. Sipas një vlerësimi të inteligjencës së Pentagonit, sulmet ndoshta vetëm sa e vonuan për disa muaj.
Burime të njohura me një vlerësim të Agjencisë së Inteligjencës së Mbrojtjes (DIA) i thanë partnerit amerikan të BBC-së, CBS, se rezerva e uraniumit të pasuruar të Republikës Islamike nuk u eliminua gjatë bombardimeve.
Shtëpia e Bardhë e hodhi poshtë vlerësimin fillestar të dëmeve, duke e quajtur atë “krejtësisht të gabuar” dhe “një përpjekje të qartë për të zhvlerësuar” presidentin Donald Trump.
Vetë Presidenti Trump deklaroi se sulmet ajrore të së shtunës “shkatërruan plotësisht dhe në mënyrë tërësore” objektet e pasurimit bërthamor të Iranit, duke shtuar se ‘SHBA-të i hoqën nga duart bombën bërthamore Iranit”.
SHBA goditi tre objekte bërthamore në Iran, Fordow, Natanz dhe Isfahan me bomba të tipit “bunker buster”, të afta për të depërtuar deri në 18 metra beton ose 61 metra tokë para se të shpërthenin.
Por ,burime të njohura me vlerësimin e inteligjencës së Pentagonit thanë se centrifugat e Iranit janë kryesisht “të paprekura” dhe se ndikimi i sulmit ishte i kufizuar vetëm në strukturat mbi tokë.
Hyrjet në dy prej objekteve bërthamore u mbyllën, dhe një pjesë e infrastrukturës u shkatërrua ose u dëmtua. Burime anonime i thanë mediave amerikane se vlerësohet që sulmi e ka vonuar Iranin “vetëm për disa muaj, në maksimum”, dhe se rifillimi i programit bërthamor do të varet nga sa kohë do t’i duhet vendit për të pastruar rrënojat dhe për të bërë riparimet.
Po ashtu, burime të tjera konfirmuan për CBS se një pjesë e rezervave të uraniumit të pasuruar të Iranit ishte zhvendosur para sulmeve, sipas vlerësimeve të inteligjencës.
Bomba amerikane 30 mijë paundëshe (14,000 kg), e quajtur Massive Ordnance Penetrator, mendohej të ishte e vetmja armë e aftë për të shkatërruar objektet nëntokësore të pasurimit bërthamor të Iranit.