Një variant i koronavirusit i etiketuar si “super mutanti” që është “më infektues” mund të shfaqet edhe pse vaksinimet po rriten. Profesori Ravi Gupta, profesor i mikrobiologjisë klinike në Universitetin e Kembrixhit, tha se virusi “do të ndyshojë në disa mënyra të çuditshme”. Ai shtoi se Covid është i paparashikueshëm dhe se “varianti indian” është vetëm fillimi. I pyetur se si duhet të përgatitemi për variantet e ardhshme, Prof. Gupta tha se deri tani ishin krijuar vaksina të mira, por duhet të bëhet më shumë presion mbi prodhuesit e tyre.
“Tani duhet të bëjmë pak më shumë presion mbi krijuesit e vaksinave që t’i përshtatin ato sipas varianteve të reja. Virusi do të bëjë disa gjëra të çuditshme. Ky është vetëm fillimi. Unë mendoj se virusi do të rikombinohet. Ju do të merrni viruse “super mutante” besoj. Kjo nuk është domosdoshmërisht një gjë e tmerrshme, por virusi do të bëjë gjëra shumë të papritura sepse sasia e presionit mbi të do të jetë e rëndë, kështu që ai do të përshtatet.
Ne e dimë që njerëzit kanë ende infeksione kronike dhe kështu ndodhin të gjitha në përgjithësi. Është e vështirë të thuash se çfarë do të ndodhë, por virusi do të gjejë mënyra për t’u bërë më infektues. Ju mund ta shihni që tashmë, kur ai është nën presion do të përpiqet të jetë më efikas në transmetim në mënyrë që të mund të arrijë punën me më pak grimca virusi” – tha ai.
Duke iu referuar disa prej mutacioneve, njëri prej tyre i përhapur në Indi, eksperti tha se ato janë “vetëm fillimi” dhe se do të ketë ndryshime të mëtejshme të virusit, jo vetëm për zhdukjen e antitrupave, por edhe për të rritur transmetueshmërinë. Varianti indian është shumë i transmetueshëm dhe po përhapet në të gjithë Britaninë. Ai është bërë lloj dominues në disa pjesë të vendit.
Prof. Gupta tha që me rritjen e injektimit të vaksinave, për shumicën e njerëzve që marrin virusin do të jetë një sëmundje e lehtë, madje edhe me “super variantet”, por gjithmonë do të ketë disa njerëz të prekshëm.
“Ne shohim që edhe me grip, kemi shumë vdekje çdo vit në grupe të prekshme. Ne përpiqemi t’i vaksinojmë së pari për t’i mbrojtur, por nuk funksionon gjithmonë. Por unë nuk mendoj se duhet të themi se do të jetë automatikisht si gripi, mendoj se ky është një virus i paparashikueshëm dhe nuk duhet të jemi tepër të sigurt në asnjë fazë” – tha ai.
Profesori Neil Ferguson, një epidemiolog në Imperial College London tha se relaksimi i kufizimeve në qershor do të varet nga sa i transmetueshëm është varianti indian.
“Për shkak se ky variant është i transmetueshëm nuk përjashtohet edhe një valë e tretë në Mbretërinë e Bashkuar. Mund të jetë në verë ose në fillim të vjeshtës kur situata është më e menaxhueshme sepse më pas rrezikon të mbingarkojë përsëri sistemin shëndetësor. Nëse tejkalon ato nivele, atëherë duhet të rishikojmë shkallën e rihapjes dhe ndoshta të ngadalësojmë hapin tjetër” – tha ai. ©LAPSI.al
