Roma dhe Interi përballen të shtunën në një sfidë që premton spektakël, e shoqëruar nga histori të shumta dhe statistika interesante.
Për Gian Piero Gasperinin, Interi mbetet një kundërshtar i veçantë dhe aspak i favorshëm. Në 17 përballjet e fundit ndaj zikaltërve, trajneri i Romës nuk ka arritur asnjë fitore, duke regjistruar 12 humbje dhe 5 barazime. Humbja më e thellë e karrierës së tij erdhi pikërisht ndaj Interit, në mars 2017, kur skuadra e tij u mposht 7-1 në “San Siro”.
Edhe Roma nuk e ka situatën më të mirë në përballjet direkte. Fitorja e fundit ndaj Interit në “Olimpico” daton më 2 tetor 2016, kur verdhekuqtë triumfuan 2-1 falë golave të Dzekos dhe Manolas.
Në qendër të vëmendjes do të jenë edhe dy sulmuesit, Lautaro Martínez dhe Donyell Malen. Argjentinasi ka qenë shpesh protagonist ndaj Romës, ndërsa Malen kërkon të shtojë Interin në listën e viktimave të tij dhe të vazhdojë garën për kreun e golashënuesve të Serie A.
Historia e përballjeve është e pasur: në 186 ndeshje mes dy skuadrave janë shënuar 540 gola, me një mesatare prej afro tre golash për takim. Interi ka 100 fitore, Roma 63, ndërsa 57 ndeshje kanë përfunduar në barazim.
Me kaq shumë histori, rivalitet dhe sulmues në formë, Roma–Inter pritet të jetë një tjetër kapitull i nxehtë i një prej dueleve më interesante të futbollit italian.
