Një ditë më parë deputeti i LSI-së, Vangjel Tavo, bëri një deklaratë tjetër në faqen e tij në Facebook për vrasjen e Kostandinos Kacifas në fshatin Bularat të Dropullit. Teksa theksonte nevojën legjitime të familjes për marrjen e trupit të djalit të tyre dhe përcjelljen për në banesën e fundit, Tavo indirekt pranonte se 35-vjeçari ishte ekstremist.
“Ne të gjithë nuk arritëm dot ta shpëtonim Konstandinos Kacifas, as nga ideologjitë e sjellja e tij e as nga vrasja e tij, por sot kemi mundësinë të shpëtojmë veten, të tregojmë që jemi ende njerëz, dhe që kemi ende zemër”, e mbyllte deklaratën deputeti Tavo.
Pra, ndonëse s’e thotë në mënyrë eksplicite sepse kjo do të shkaktonte reagim në radhët e minoritetit, aty ku ka shumë mbështjetje elektorale, Tavo flet për një ideologji në të cilën ishte përfshirë Kacifas dhe se nuk u arrit dot të shpëtohej prej saj. Po cila ishte kjo ideologji? Natyrisht ideologjitë ekstremiste e nacionaliste greke që luftojnë për të ashtuquajturin Vorio Epir. Për këtë akuzohet sot publikisht Kostandinos Kacifas, si një person i indoktrinuar që hapi zjarr ndaj Policisë së Shtetit në emër të luftës për të ashtuquajturin Vorio Epir.
E pavarësisht pranimit nën zë të faktit se Kacifas ishte ekstremist, Tavo shkoi në familjen e tij, për t’i shprehur ngushëllimet bashkë me eurodeputeten greke, Eleni Theocarus. Vizita në familje dhe shprehja e ngushëllimeve është një gjë krejt normale e njerëzore për familjen. Në një video të publikuar nga mediat greke, shfaqet nëna e Kacifas duke i shpjeguruar Tavos sesi u terrorizua nga policia.
‘Erdhën shqiptarët gegë nga Tirana. Jo Vangjel, duhet të kishit folur të gjithë, të mos i lenit. Kishte drejtësi, përse duhet të më vinin mua të gjithë në shtëpi. Për cilin qëllim? Nëse ai (Kacifas) do të kishte për qëllim të vriste, do kishte vrarë ndonjë dhjetshe (10 vetë). E beson këtë Vangjeli?”, thotë nëna e Kacifas.
“Po e besoj, kjo është e vërteta. Ai kishte mundësi ta bënte këtë gjë”, i përgjigjet Tavo. Shihni videon më poshtë.
©ArgjiroLajm.net
