Ministrja e Zhvillimit Ekonomik, Turizmit, Tregtisë dhe Sipërmarrjes, Milva Ekonomi, së bashku me Ministren e Kulturës, Mirela Kumbaro morën pjesë dje në një aktivitet me Dhomën e Tregtisë së qarkut Gjirokastër.
Gjatë këtij takimi, Ekonomi është pyetur për mundësitë që Shqipëria ka për hapjen e një aeroporti në jugun e vendit.
“Jo vetëm ministria e Ekonomisë, por edhe ministria e Transportit dhe Infrastrukturës, ministria e Financave, po përpiqemi të gjykojmë për një studim fizibiliteti për një aeroport që mund të jetë në jug të vendit.
Natyrisht që ka një konkurrencë pozitive përsa i takon një aeroporti në jug të vendit, sepse po mendohet se ku është zona më e mirë për të ndërtuar aeroportin, për t’i krijuar lehtësira dhe turistëve që vijnë, sepse ne e dimë se ka një kohë të domosdoshme që nuk mund të tejkalojë një turist për të vizituar një vend të caktuar, dhe kjo është jo më shumë se 60 minuta nga momenti i mbërritjes në aeroport për të shkuar drejt një ‘site’ turistik që kemi. Kështu që, janë në diskutim pika të ndryshme për të ndërtuar një aeroport në jug. Akoma nuk ka mbaruar studimi i fizibilitetit. Nuk mund të kemi një përgjigje sot”, tha ajo.
