Tepelenë, deri tani janë gjetur 420 eshtra ushtarësh grekë. Athina pretendon për rreth 8 mijë vetë (VIDEO)

Kërkimet për eshtrat e ushtarëve grekë të rënë gjatë luftës Italo-Greke në jugun e Shqipërisë vazhdojnë me ritme të shpejta. Mësohet se deri tani në gërmimet e kryera në fushën e Sajmolës në zonën e Dragotit, Tepelenë janë zhvarrosur 420 eshtra, ndërsa kërkimet për eshtra të tjera ushtarësh po vijojnë. Eshtrat e gjetura i janë nënshtruar procesit të identifikimit, ndërkohë që sipas informacioneve që vijnë nga pala greke ka patur një interes të lartë të të afërmve të të rënëve gjatë luftës italo-greke në zonën e Dragotit. Pala greke pretendon vijimin e gërmimeve me qëllim gjetjen e të gjithë të të rënëve të mbetur të pavarrosur ose të varrosur përkohësisht për 78 vjet në këto zona. Sipas tyre kjo shifër shkon në 7976 vetë.  Qafa e Kiçokut, Kosina dhe Ballabani janë pikat ku do të ndërmerret procesi i gërmim-zhvarrimeve nga grupi dypalësh. Ekspeditat e përcaktuara në marrëveshjen dypalëshe ndërshtetërore, priten të ndërmerren pas zhvarrimeve në Dragot ku mendohet se ekspedita do të vijojë deri më mars të vitit 2019.