Absolutisht dallohet qartë që Vllaznia është në momentin e saj më të vështirë që prej nisjes së kampionatit. Me kuqeblutë që në fazën e parë të edicionit u dalluan si skuadra që bën diferencën dhe luan futbollin më të bukur në Superiore.
Madje me ekipin e Martinit duke u cilësuar si pretendenti numër një për fitimin e titullit kampion. Por, duket se opinioni i javëve të fundit nuk i konsideron më 9 herë kampionët e vendit si të “pathyeshëm”, kjo për vetë formën që kanë treguar shkodranët së fundmi. E cila përkon me formën e një skuadre që luan për mbijetesën në Superiore dhe jo një ekipi që pretendon titullin kampion në fund të sezonit.
Kështu në 5 javët e fundit në kampionat, kuqeblutë kanë grumbulluar vetëm 5 pikë, kështu duke pasur një fitore 1-0 kundër Dinamos, një barazim 1-1 ndaj Partizanit, humbje 0-1 kundër Teutës, barazim 0-0 me Vorën dhe së fundmi një tjetër disfatë 1-0 kundër Elbasanit. Ku më dobët se kuqeblutë këtë periudhë kanë bërë vetëm Bylis që ka grumbulluar 2 pikë dhe Tirana që ka marrë vetëm një pikë. Me dy skuadrat e sipër përmendura që si objektiv kanë qëndrimin në kategori në fund të sezonit.
Gjatë 5 javëve të fundit Vllaznia po ashtu ka shënuar vetëm 2 gola dhe pësuar 3 të tillë. Ku madje në 3 ndeshjet e fundit skuadra nuk ka shënuar asnjë gol, duke pasur një thatësirë prej 270 minutash për të gjetur golin në portat kundërshtare.
Diçka që nuk i kishte ndodhur në asnjë moment deri më tani në kampionat kuqebluve, të cilët duhet të gjejnë reagimin e duhur dhe sa më të shpejtë. Pasi tashmë janë në ndjekje të kreut të Superiores, ku diferenca është 4 pikë me Elbasanin, me verdheblutë që kryesojnë me 29 pikë e ndërsa shkodranët ndodhen në vendin e 4-ët me 25 pikë pas 15 javësh të edicionit.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
