POLICIA E SHTETIT
Specialistët për Hetimin e Krimeve të Komisariatit të Policisë Tepelenë kanë arrestuar në flagrancë shtetasen T. C., 49 vjeçe, banuese në Tepelenë, pasi ka shkelur masën e sigurisë “Arrest në shtëpi”.
Sipas njoftimit zyrtar, masa e sigurisë ishte caktuar më herët nga Gjykata e Durrësit për veprën penale “Shkelja e rregullave të qarkullimit rrugor”. 49-vjeçarja dyshohet se ka thyer detyrimin për të qëndruar në banesë, duke mos respektuar vendimin e gjykatës.
Pas arrestimit, materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm në Gjirokastër, për veprime të mëtejshme ligjore.
Autoritetet bëjnë me dije se kontrollet për zbatimin e masave të sigurisë vijojnë, me qëllim garantimin e respektimit të vendimeve gjyqësore.
