Jo vetëm Redon Xhixha, Tirana rikthen në kryeqytet një tjetër ish të famshëm, një nga pikat kryesore që sollën titullin kampion në vitin 2022, bëhet fjalë për Visar Bekaj. Portieri 28-vjeçar mbylli aventurën e tij në Turqi, tek ekipi i Hatajspor, skuadër ku këtë periudhë u larguan të gjithë futbollistët e huaj pas problemeve me pagesat. Bekaj rikthehet në Tiranë, aty ku firmosi një kontratë deri në 2027: “Ai i njeh ngjyrat. Ai e njeh edhe stemën. Është kthyer aty ku i takon deri në vitin 2027. Një nga ne”, shkruan klubi bardheblu në videon e prezantimit të Visar Bekaj.
Afrimi i portierit të përfaqësueses së Kosovës konsiderohet si një tjetër goditje e fortë, një afrim cilësor dhe me shumë kosto. Bekaj shndërrohet në lojtarin më të paguar në Superiore pasi do të përfitojë në kryeqytet afro 15 mijë euro në muaj. Bekaj firmosi një kontratë për 1,5 vite, por me një klauzolë të përfshirë që e lejon të largohet nga Tirana gjatë verës nëse vjen ndonjë ofertë nga jashtë Shqipërisë.
Klubi bardheblu është ekipi më aktiv në këtë merkato janari pasi Bekaj është vetëm afrimi i fundit, në një kohë kur në kryeqytet kanë zbarkuar edhe lojtarë të tjerë si Xhixha, Ernest, Freddy Alvarez, Anton Kresic etj. Imapakti i afrimeve të janarit ka qenë i menjëhershëm pasi në 3 ndeshjet e fundit Tirana ka marrë 7 pikë, ndërsa që në dy fazat e para, në 16 ndeshje në total kishin marrë vetëm 10 pikë.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
