Tirana numëron vetëm 12 pikë në renditjen e Superiores, por pozicioni i saj në klasifikim mund të ishte krejt ndryshe nëse skuadra bardheblu do të kishte ditur të administronte avantazhet e krijuara në ndeshjet e fundit.
Ekipi kryeqytetas po paguan shtrenjtë mungesën e përqendrimit dhe pamundësinë për të ruajtur epërsinë, duke lënë rrugës pikë të rëndësishme që mund ta kishin ndryshuar tërësisht sezonin.
4 GABIMET – Në katër përballjet e fundit të evidentuara, Tirana ka humbur plot 10 pikë pasi ka kaluar e para në avantazh. Gjithçka nisi në sfidën me Skënderbeun, ku bardheblutë nuk arritën të ruanin epërsinë dhe u detyruan të kënaqeshin me një barazim 1-1. E njëjta histori u përsërit edhe në përballjen me Dinamon, që përfundoi me të njëjtin rezultat. Në të dyja rastet, Tirana la dy pikë në dispozicion të kundërshtarit.
Situata u bë edhe më e vështirë në përballjet me Teutën dhe Egnatian. Përballë durrsakëve, Tirana kaloi në avantazh, por më pas pësoi tri gola dhe u largua me humbjen 3-1. Ndërkohë, edhe ndaj Egnatias, skuadra bardheblu e nisi mirë takimin, duke shënuar që në minutën e pestë me Drilon Hazrollajn. Megjithatë, kampionët përmbysën gjithçka dhe fituan 2-1, duke i lënë Tiranës një tjetër humbje të dhimbshme.
Llogaritë janë të qarta. Dy barazimet i kanë kushtuar nga dy pikë, ndërsa dy humbjet nga tri pikë secila. Në total, bëhet fjalë për 10 pikë të shpërdoruara nga pozitat e avantazhit. Nëse Tirana do t’i kishte administruar siç duhet këto ndeshje dhe do të kishte marrë fitoret, sot do të numëronte 22 pikë, në vend të 12 që ka aktualisht.
Një shifër që do ta ndryshonte rrënjësisht panoramën e renditjes. Me 22 pikë, Tirana do të pozicionohej në vendin e dytë të Superiores, pas Egnatias, që kryeson me 24 pikë. Pra, vetëm dy pikë do ta ndanin nga kreu i kampionatit.
Në vend që të luftojë për t’u larguar nga fundi i klasifikimit, skuadra bardheblu mund të ishte një prej pretendenteve në ndjekje të kampionëve. Për Tiranën, problemi nuk është vetëm te pikët e humbura, por edhe te përsëritja e një skenari që po kthehet në një kosto të madhe për ecurinë e saj në kampionat.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
