Tirana është në luftë me kohën për të bërë skuadrën e sezonit të ri. Edhe gjatë ditës së hënë bardheblutë nuk zyrtarizuan as drejtorin e ri sportiv dhe as trajnerin që do të pasojë Bledi Shkëmbin. Për çështje lojtarësh nuk diskutohet, që është ende shpejt për të folur.
LIMITI – Drejuesit e skuadrës kanë vendosur që brenda ditës së enjte të kenë një vendim përfundimtar për drejtorin e skuadrës. Gjatë kësaj jave do të vendoset timonieri bardheblu. Me shumë mundësi, drejtimin menaxherial mund ta marrë Tefik Osmani, i mbështetur nga Grent Halili. Po kështu, emri i trajnerit intrigon më shumë se Cungun apo Mezanin që janë futur në lojë. Gjithsesi, duket se Tirana po sheh edhe kandidatura nga jashtë vendit.
STËRVITJA – Në plan Tirana kishte nisjen e stërvitjes në 1 korrik, por duket se gjërat kanë ndryshuar. Skuadra është njoftuar se përgatitjet do të nisin më 5 korrik ose, më saktë, ditën e shtunë. Lojtarët e kanë marrë mesazhin dhe po bëhen gati të kthehen në fushë. Janë njoftuar edhe të huajt, të cilët do të jenë në Tiranë brenda javës. Edhe nëse nuk nis të shtunën stërvitja, e hëna është dita përfundimtare e nisjes së përgatitjeve për sezonin e ri.
LARGIMET – Nga 1 janari e deri më 30 qershor 2025, Tiranës i janë larguar 12 futbollistë, duke bërë që skuadra t’i futet sërish një revolucioni të vërtetë, një vit pasi Bledi Shkëmbi dhe Agim Ibrahimi ndërtuan ekipin nga themelet. “Panorama Sport” ka vëzhguar të gjitha ikjet dhe rezulton se deri tani kanë dhënë lamtumirën pa kthim 12 futbollistë, por lista ka edhe emra të tjerë. Në dimër u largua Aran Isuf, i cili nuk kishte më shumë se 6 muaj kontratë. Më pas, me radhë: Tola, Jonuzi, Vokrri, si dhe Jaku. Ky i fundit u shit te Bolonja për një shumë 250 mijë euro. Pa llogaritur dy lojtarët që janë dhënë borxh, Cereni dhe Abdullahu. Eksodi i vërtetë nisi në fillim të qershorit. Deri tani, janë larguar Selmani dhe Harizaj në portë. Fati i Leon Kozit është i paqartë dhe nuk dihet nëse do të jetë edhe sezonin tjetër në ekip. Në mbrojtje, Përgjoni ka dhënë lamtumirën dhe është larguar, Gledi Mici është pa kontratë dhe konsiderohet i ikur. Mesfusha, veç emrave të mësipërm, nuk dihet nëse do të ketë edhe Erisildo Smaçin, i cili nuk ka kontratë, por është në dorë të klubit për të zgjatur rinovimin. Në sulm, tre lojtarë me një të rënë të lapsit kanë ikur. Ata janë Ndreca, Bajroviç dhe Prengaj.
