Zbulohet identiteti i viktimës së atentatit në Elbasan. Everest Çaka është viktima i atentatit, teksa trupi i tij ndodhet në makinë. Mësohet se e plagosur ka mbetur dhe bashkëshortja e tij, Silvana Çaka pasi udhëtonin në të njëjtën makinë, teksa kjo e fundit është transportuar në spital për mjekim. Disa minuta më parë një atentat ndodhi në Elbasan ku deri më tani ka një të vrarë dhe një të plagosur, teksa autorët janë larguar nga vendngjarja.
Informacion paraprak nga policia
Rreth orës 20:10, në lagjen “Skënderbe”, Elbasan, në rrethana ende të paqarta është vrarë me armë zjarri në mjet shtetasi E.Ç, rreth 41 vjeç si dhe është plagosur në dorë bashkëshortja e tij shtetasja S.Ç., jashtë rrezikut për jetën. Shërbimet e Policisë kanë shkuar menjëherë në vendngjarje dhe kanë rrethuar zonën. Janë ngritur pika konrolli në hyrje – daljet në qytetin e Elbasanit dhe vijon kontrolli i zonës. Grupi hetimor nën drejtimin e Prokurorisë ndodhet në vendngjarje dhe vijon puna për zbardhjen e plotë të shkakut dhe rrethanave të ngjarjes si dhe identifikimin e kapjen e autorit/ve.
Ndërkohë kujtojmë se në 24 orët e fundit disa ngjarje të rënda kanë ndodhur në vend, që nga vrasja e Mehmet Qemës dje në Tiranë, vrasja në Vlorë e Bledar Birçaj, duke u pasuar dhe me aksidente të rënda si ai i minatorëve në Bulqizë dhe aksidenti me pasojë vdekjen e Fatmir Avdillari, 45 vjeç, i cili konsiderohet si një ndër “të fortët” e Yzberishtit, por edhe të Selitës.
