Një grup kriminal i bazuar në Itali është shkatërruar ditën e sotme. Ansa shkruan se grupi i kryesuar nga dy vëllezër shqiptarë dhe i përbërë nga italianë e shqiptarë, transportonin drogë nga Holanda në Itali.
Operacioni për shkatërrimin e grupit është kryer në koordinim nga DDA-të e Bolonjës dhe Firences. Nga ky operacion u arrestuan tetë persona, mes të cilëve kishte shqiptarë dhe italianë.
Nga hetimet kanë rezultuar të përfshirë të paktën 48 persona, ndërsa njëri grup me shqiptarë kryesohej nga dy vëllezër dhe një bashkëatdhetar. Dyshohet se siguronin sasi të mëdha kokaine që blihej në Holandë me një çmim që varionte nga 24,000 deri në 30,000 euro për kilogram, në varësi të cilësisë së drogës.
