Pasi komisioni “Ruli” e skualifikoi nga gara e mëtejshme për deputet i Partisë Demokratike, Tritan Shehu ka zgjedhur një strategji tjetër me shpresën se do t’i imponohet Lulzim Bashës për të qenë sërish në krye të listës së kandidatëve të qarkut Gjirokastër. Fillimisht nxitoi të bënte disa deklarata publike se nuk e njihte vendimarrjen e atij komisioni, por i besonte Bashës dhe forumeve të tjera në parti. Ndërkohë sot sajoi një takim me strukturat vendore të PD-së në rang qarku, që më shumë ngjante si takim lamtumire nga Gjirokastra sesa si takim shprese për zgjedhjet e 25 prillit. Le më pastaj që ishte në shkelje të plotë të masave antiCovid pasi në sallë kishte më shumë se 10 persona dhe shumica pa maska, por kjo është temë tjetër.
Duke përdorur Dasho Alikon, i cili është më i zellshmi ndër të gjithë kur është fjala për t’i vënë në gojë fjalë që as i ka shkruar vetë e as i beson, u njoftua se “drejtuesi i qarkut Tritan Shehu” do të zhvillonte takim me strukturat e PD-së në qark. Problemi është se Basha nuk i ka përcaktuar ende drejtuesit politikë të qarqeve. Javën që shkoi u zyrtarizua vetëm Shkodra, Fieri e Vlora. Për Gjirokastrën nuk ka ende asnjë emër. Madje procesin e zgjedhjeve të brendshme e koordinoi Ervin Salianji. Ajo që bëri Tritan Shehu me takimin e sotëm është thjesht një përpjekje e dëshpëruar e tij për t’i bërë përshtypje Lulzim Bashës, për t’i treguar se ai gëzon mbështetje në Gjirokastër dhe prandaj e meriton të jetë sërish drejtuesi politik i qarkut.
Në takim ra në sy mungesa e shumë prej anëtarëve të Kryesisë së PD-së apo drejtuesi i Forumit Rinor. Mbetet për t’u parë se sa Basha do e hajë presionin imagjinar të Tritan Shehut, me gjoja mbështetjen e gjerë që ai gëzon në qark dhe pretendimin se ai është i denjë për të udhëhequr PD-në drejt betejës më të rëndësishmë elektorale që nga vitet ’90. Tritan Shehu është një humbës recidivist në Gjirokastër. Humbi zgjedhjet lokale të vitit 2015, humbi zgjedhjet parlamentare të vitit 2017 dhe zgjedhjet e 2019 që dihet si shkoi historia. Me të në krye PD-ja do të koleksionojë një tjetër humbje të thellë më 25 prill.
Është shumë e thjeshtë, përveç ligjërimit të tij politik të neveritshëm, Tritan Shehu i përket një epoke tjetër që s’ka lidhje fare me PD-në e sotme. Është si një njeri i ardhur nga shekulli i kaluar që nuk frymëzon dot as ata që ishin në takim nga halli se s’kanë ku shkojnë tjetër, thjesht presin mbase vijnë në pushtet për të kapur ndonjë drejtori, jo më të frymëzojë elektoratin përtej strukturave të PD-së. Si për të përforcuar më shumë këtë vlerësim tonin, kishte edhe një detaj nga takimi i sotëm.
Tritan Shehu iu tregonte demokratëve që rrinin kokëulur e dëgjonin nga halli, se ai përpara se të vinte në Gjirokastër kishte komunikuar në telefon me Berishën dhe se atij iu bë zemra mal e i përcolli të fala, madje i pati thënë se të gjithë ishin miqtë e tij. Tipike nga ato mufkat që thuheshin në fillim të viteve ’90 për të ‘eksituar’ militantët trushplarë. Tritan Shehu është i asaj kohe dhe kurrsesi nuk mund të çojë sot përpara PD-në e vitit 2021. Vetë demokratët që heshtin nga frika se s’kanë ku shkojnë, i bëjnë më shumë dëm vetë PD-së sesa partive të tjera në garën e 25 prillit. Mbetet për t’u parë se çfarë vendimi do të marrë Basha. A do ta përsërisë gabimin e vitit 2017 me Tritan Shehun në krye apo do t’ia japë dikujt tjetër drejtimin e qarkut Gjirokastër, ku PD-ja do të ketë një betejë të ashpër me LSI-në për mandatin e dytë.
©argjiroja.net
