Tronditet Serie A/ Skuadra e Genoa “vatër” infeksioni, 10 futbollistë dhe 4 pjesëtarë të klubit pozitiv me COVID

Ishte fillimisht portieri Matia Perin dhe më pas Schonë që rezultuan pozitiv me koronavirus,ndërsa tani te Genoa janë plot 10 futbollistë të cilët janë infektuar me COVID-19. Ka qenë vetë klubi i Genoas që nëpërmjet një komunikate të shpërndarë mbrëmjen e sotme, ka njoftuar se pas Perin e Schone, edhe 8 futbollistë të tjerë kanë rezultuar pozitivë, ndërsa të infektuar janë edhe 4 pjesëtarë të stafit teknik, duke e çuar numrin total në 14 të prekur.
“Klubi i Genoas njofton se pas hetimeve të rasteve ditën e sotme, numri i personave të infektuar nga Covid-19 ka shkuar në 14, mes futbollistëve dhe pjesëtarëve të stafit. Shoqëria ka nisur të gjithë procedurat e parashikuara nga protokolli në fuqi dhe ka njoftuar autoritetet për situatën. Do t’ju mbajmë të përditësuar për gjithçka”, shkruhet në komunikatën e klubit ligur.
Ndërkohë vlen të theksohet se tashmë të gjithë futbollistët dhe pjesëtarët e stafit të Napolit do të duhet t’i nënshtrohen testit anti-Covid, pasi patën kontakt të drejtpërdrejtë me futbollistët kuqeblu.