Trump pezullon tarifat ndaj Meksikës, shtyhet afati deri në fund të tetorit

Meksika duket se ka shmangur vendosjen e tarifave të reja tregtare nga Shtetet e Bashkuara, të cilat pritej të hynin në fuqi mesnatën e së enjtes. Presidenti amerikan Donald Trump njoftoi një pezullim të përkohshëm të masave, pas një bisede me presidenten meksikane Claudia Sheinbaum.
Sipas marrëveshjes së mëparshme, nga 1 janari 2026, SHBA do të vendoste tarifa 30% për të gjitha produktet meksikane. Por me marrëveshjen e re të përkohshme, afati është shtyrë me 90 ditë, deri në fund të tetorit, ndërsa negociatat për një marrëveshje të përhershme do të vazhdojnë.
Në një postim në rrjetin e tij Truth Social, Trump tha se “nuk do të jetë e lehtë” të arrihet një marrëveshje përfundimtare me Meksikën, duke theksuar se çështjet kufitare përbëjnë sfida të veçanta krahasuar me vendet e tjera.
Ai shtoi se, bashkë me presidenten Sheinbaum, janë pajtuar për zgjatjen e një marrëveshjeje ekzistuese, e cila përfshin tarifa mbi disa kategori specifike të produkteve meksikane.
Meksika do të vazhdojë të paguajë tarifa 25% për produktet që lidhen me fentanilin, 25% për automjetet, si dhe 50% për çelikun, aluminin dhe bakrin. Po ashtu, Meksika ka pranuar të heqë menjëherë barrierat jotarifore që kufizonin tregtinë me SHBA, për të cilat Trump u shpreh se “ishin të shumta”.
Ky zhvillim vjen në një moment kur tensionet tregtare mes dy vendeve kanë qenë në rritje, veçanërisht për shkak të çështjeve të sigurisë kufitare dhe luftës kundër trafikut të drogës.