Nëse mjaft raportime të mediave të huaja i përshkruajë shqiptarët si trafikantë apo dhunues, ka mjaft të tjerë që eksportojnë vlerat tona reale përmes shembullit që japin. Së fundmi një turist kroat ka mbetur i befasuar nga ajo që i ka ndodhur në Shqipëri ku ai ka humbur portofolin ditën e fundit të pushimeve në Sarandë.
Pas kthimit në Kroaci, kur nuk kishte më shpresë se mund ta gjente, atij i ka ndodhur diçka që nuk e kishte menduar kurrë. Portofoli dhe gjithçka kishte brenda i ka mbërritur me postë në shtëpi.
I riu Alban Koka që ka gjetur portofolin, ia ka dërguar shoqëruar me një shënim miqësor: “E di që ia kalove shumë mirë në Sarandë por nuk ishte nevoja të lije një bakshish kaq të madh :)” Fill pas kësaj, kroati e ka ndarë ngjarjen me miqtë e tij në rrjete sociale ku shqiptarët janë komplimentuar.
“Ma dërguan portofolin me të gjitha paratë brenda dhe të gjitha kartat bankare. Shqipëria është kaq e bukur, shqiptarët janë njerëz ekstra”, nënvizon ai.
