Shtëpia e futbollit UEFA ka nisur procedimet disiplinore ndaj Federatës Shqiptare (FSHF) për disa incidente të ndodhura në ndeshjen ndaj Italisë, ku përfshihet lojtari që hyri në fushë, hedhja e objekteve si dhe një “mesazh provokues”.
Shqipëria bëri një paraqitje solide ndaj Italisë, pavarësisht që pësuan humbje me rezultat të ngushtë 2:1.
Megjithatë, UEFA ka njoftuar përmes një komunikate zyrtare se kanë hapur procedurën disiplinore për “transmetimin e një mesazhi provokues të papërshtatshëm për një ngjarje sportive”.
Mediumet serbe janë ankuar vazhdimisht të dielën për logon e Ushtrisë Çlirimtare të Kosovës (UÇK) që u valëvitë gjatë tërë kohës në stadium, megjithatë UEFA nuk ka bërë me dije nëse këtë e kanë vlerësuar si “mesazh provokues”.
Vendimi i UEFA-s do të bëhet zyrtar në ditët në vijim, ku pritet të zbulohen edhe detajet e tjera se për çfarë e kanë fjalën më saktësisht.
Shqipëria të mërkurën vazhdon rrugëtimin në Evropian, ku e pret një tjetër përballje e vështirë – këtë herë me Kroacinë, me fillim nga ora 15:00.
