Kryeministri Edi Rama zhvilloi të mërkurën një takim me ministren e Ekonomisë dhe Inovacionit, Delina Ibrahimaj, Inspektorin e Përgjithshëm, Dashnor Sula dhe inspektorët e terrenit, pas të cilit njoftoi disa ndryshime në punën e tyre.
“Kontrollet e inspektimeve duhet të kalojnë testin e besës. E para, nuk duhet të ketë më asnjë kontroll pa paralajmërim. Inspektori nuk vjen te dera e biznesit në një skenë krimi, por si shteti që njofton, të mbikëqyr dhe të ndihmon të korrigjohesh”, tha Rama përmes një videomesazhi në Facebook. “Qëllimi ynë nuk është t’i kapim subjektet në gabim, po t’i ndihmojmë të përmirësohen në zbatimin e ligjit dhe në përmbushjen e standardeve që janë interesi ynë i përbashkët”.
Rama shtoi se gjoba mbi një biznes është arma e fundit, jo e para. “Dhe kurrë një shpatë shantazhi mbi qafën e sipërmarrësit për të gjetur një mënyrë tjetër pastaj për ta shmangur gjobën dhe kush nxjerr gjobën përpara fjalës mirë nuk po e mbron shtetin, por po e turpëron atë”, u shpreh ai.
Rama u bëri thirrje bizneseve që nëse u vjen një inspektim pa paralajmërim për një kontroll rutinë nga cilido inspektorat, duhet ta denoncojë menjëherë tek Inspektori i Përgjithshëm. “Kjo nuk është ankesë, kjo është e drejtë dhe këtë të drejtë ne mund ta vendosim vetëm së bashku, qeveria dhe sipërmarrja. Dhe së fundi, së shpejti, çdo inspektor që troket në emër të shtetit te dera e një tatim paguesi të kësaj republike, do të jetë i pajisur me kamerën inteligjente të trupit dhe i veshur me uniformë që ta dish kush është, kë përfaqëson dhe që ai vetë ta dijë se në çdo minutë të punës së tij është i mbikëqyr nga inspektorati i përgjithshëm. Shteti që hyn në derën e njerëzve duhet t’ bëjë ata krenarë për taksat që ata i paguajnë këtij shteti”, tha Rama.
