Një e re ka shpëtuar për mrekulli nga prerja e këmbës pas një pickimi helmues nga gjarpri. Ngjarja ka ndodhur dy ditë më parë në Përmet, ku L. A., 26 vjeçe, u godit nga gjarpri teksa ndodhej në një zonë periferike.
Vajza u transportua me urgjencë në Spitalin e Përmetit për të marrë ndihmën e parë e më pas në spitalin e Gjirokastrës, ku iu bë kundërhelmi.
Por nga meraku familjarët e nisën drejt Tiranës te Spitali i Traumës për mjekim më të specializuar.
Sipas familjarëve, që i referohen mjekëve të Tiranës, helmi kishte depërtuar deri në rrezen e kofshës dhe çdo minutë vonesë për trajtim mund të kishte sjellë pasoja fatale.
Fillimisht pati raportime se në spitalin e Gjirokastrës vajzës nuk iu bë antidoti sepse kishte mungesë, por vetë spitali e ka mohuar këtë gjë.
Në një reagim për Argjiroja.net, drejtues të spitalit të Gjirokastrës thanë se vajzës i është kryer i gjithë mjekimi sipas protokollit dhe se nuk kishte asnjë mungesë antidoti. Drejtuesit e spitalit hedhin poshtë raportimet e pavërteta në media.
