Deputeti i LSI-së në Gjirokastër, Vangjel Tavo u ‘shfaq’ sot befas në faqen e tij në Facebook, teksa shpërndau një urim me rastin e Ditës Kombëtare të Rinisë. Një nga ato urimet e zakonshme që politikanët i bëjnë shpesh për inerci, por edhe sepse kështu këshillohen nga njerëzit që e njohin marketingun polik. Por në këtë rast, tjetër gjë bën përshtypje. Vangjel Tavo përcjell urim për Ditën Kombëtare të Rinisë, ndërsa nuk ka dhënë asnjë mesazh solidariteti për apokalipsin që përfshiu Gjirokastrën. Në faqen e tij në Facebook, por as në mediat lokale nuk gjen asnjë reagim të tij për situatan e vështirë që kaloi qarku ku ai është zgjedhur deputet.
Mbase jo me patjetër të dilte edhe ai me çizme e mushama mes shiut e tufanit, por të paktën dy fjalë në Facebook mund t’i shkruante. Edhe një postim i tillë ka simbolikën e vet, qoftë për t’i dhënë kurajo ekipeve të emergjencave apo njerëzve që ishin në vështirësi. Nuk ndodhi dhe arsyen e vërtetë s’e dimë. Por ky rast shërben për të kuptuar se si në kohë fushate politikanët bëjnë çmos për t’u dukur të gjendshëm për qytetarët dhe sapo zgjedhjet mbarojnë, ata thjesht largohen duke shijuar në qetësinë e vet benefitet e pushtetit që u ka dhënë populli. Patjetër që ky është edhe rasti i Vangjel Tavos, ndonëse burime të ArgjiroLajm.net thonë se ai kishte qenë në Dropull para disa ditësh.
Por thjesht pati një takim me njerëzit e vet të shkarkuar rishtaz nga administrata, por edhe ata që rezistojnë ende, të cilëve u komunikoi të ‘kalitin durimin’ sepse pritet të ketë zgjedhje të parakohshme në muajin mars. Është thjesht një përpjekje për të mbajtur të bashkuar grupin e tij, aq më tepër kur është fjala për LSI-në, elektorati i së cilës nuk është aq solid sa i dy partive të mëdha, PD-së e PS-së. Por përtej kësaj, ajo që i habiti të gjithë, madje edhe njerëzit e tij besnikë, ishte heshtja e Tavos për përmbytjet në Gjirokastër dhe bastionin e tij, Dropullin. Heshtja është thjesht një shkujdesje e tij apo fshihet diçka tjetër pas? Ç’të ketë ndodhur vallë?
©ArgjiroLajm.net