Rreth një vit më parë kur nisi djegia e mandateve nga opozita, Vangjel Tavo pretendonte se ai kishte ngatërruar emrin e babait kur firmosi për dorëzimin e mandatit. Në fakt ishte thjesht një manovër e tij për të fituar kohë sepse besonte që sipas tij Rama do i thërriste mendjes dhe do i shkonte pas veprimit amatoresk të PD-LSI për t’i ndaluar që ata të dilnin nga Kuvendi. Sot Vangjel Tavo është duke përgatitur alibinë për humbjen e pritshme në zgjedhjet e 25 Prillit. Ai ka hedhur akuza, por pa paraqitur ndonjë fakt apo provë, se i kanë hequr emrin nga Dropulli dhe ia kanë caktuar tjetërkund (Pa thënë se ku) Tavo pretendon gjithashtu se bashkë me të janë transferuar edhe 300 banorë të tjerë të Dropullit. Ja cfarë shkruan ai:
Skandal – Skandal – Skandal Qeveri harbute, dashakeqe dhe e ligë. E frikësuar gjer në palcë për largimin e saj të sigurt e të pashmangshëm ka kryer veprime të qëllimshme për çrregjistrimin e banorëve nga vendbanimet e tyre duke i regjistruar në qytete të tjera. Emrin tim, pa asnjë kërkesë timen, e kanë hequr nga Dropulli dhe e kanë caktuar tjetërkund. 300 banorë të Dropullit i kanë çrregjistruar pa dijeninë dhe kundër dëshirës që të mos votojnë në Dropull. Gabim njerëzor justifikohen por është i qëllimshëm me synim pengimin e votuesve kundër sektit të ligë e në largim të “Rilindjes.” Kjo po ndodh në të gjithë vendin. Duke u justifikuar me gabim njerëzor cilitdo që ankohet u kërkohen dokumentacion për t’u rikthyer në regjistrimin e vendbanimit apo gjendjes civile. Kjo kërkon kohë dhe pengon banorët të votojnë. Ky është një plan i qëllimshëm elektoral që duhet ndalur sa më parë. Ky është një plan i ligë, antidemokratik dhe antiligjor. Kjo është një arsye më shumë për ta shporrur përgjithmonë këtë sekt malinj që ka shkatërruar vendin.
