Nuk do të kishte qenë etike nga ana e Edi Ramës që në një fushatë si kjo, pas gjithë atyre fjalëve të bukura, pas takimeve, marrëveshjes, komplimentave të ndërsjella etj etj, të kishte harruar se Lulzim Basha sot bën 43 vjeç.
Dhe Edi Rama nuk zhgënjeu. Në transmetim direkt në televizione, ndërsa fliste mes simpatizantëve në Shkodër, ai bëri një urim me ironi dhe njëkohësisht të ndjerë për Lulzim Bashën.
“Lulzim edhe 100! Edhe i paç 100 vitet e ardhshme në gjumin më të ëmbël që dëshiron! Sinqerisht tani, shëndet për familjen dhe fëmijët!” u shpreh Rama.
Ndërkohë gjatë paradites së sotme, një prej mjeteve të kryeministrisë ka hyrë në oborrin e selisë së PD-së, me një porosi të veçantë, dhuratën e Edi Ramës për Lulzim Bashën.
Kryeministri i dërgoi një shishe verë, kreut të PD-së. Momentalisht mes Ramës dhe Bashës po konsumohet një flirt, që asnjë prej të dyve nuk e fsheh dot.
