Ish-zyrtari socialist Veli Mehmeti ka reaguar në lidhje me akuzat ndaj tij nga drejtuesja politike e PD për diasporën, Jozefina Topalli, e cila tha tha se “zyrtarë të PS-së po manipulojnë votat në Greqi dhe Itali”.
Sipas Topallit, persona të lidhur me PS-në kanë grumbulluar zarfet e votimit të diasporës dhe kanë votuar në emër të tyre. Këto pretendime janë hedhur poshtë nga Mehmeti, i cili përmes një reagimi ka mohuar çdo përfshirje në këtë proces dhe i ka cilësuar akuzat si shpifje të pastra dhe pjesë të një strategjie të opozitës për të justifikuar një tjetër humbje zgjedhore.
Reagimi i plotë:
Kur na ndajnë vetëm pak ditë nga dita e zgjedhjeve të 11 majit, dhe kur duhet patjetër alibia për humbjen e rradhës, opozitës nuk i ka mbetur gjë tjetër veçse të ngrejë “furtunë” në një gotë me ujë.
Nëpërmjet një shpifje të ulët, gatuar nga e njëjta kuzhinë ku u gatua edhe çorba me Babale, por që kësaj rradhe u servirën për publikun nga zonja Jozefinë, duan të delegjitimojnë proçesin elektoral për votën diasporës por edhe atë brenda vendit.
Ne nuk i shpëtojmë dot nga humbja dhe as nga sëmundja patologjike e nevojës për shpifje, por një sqarim për miqtë dhe shokët që lexuan dhe dëgjuan dje në kanale dhe portale dy shpifje të rëndomta për përsonin tim ju detyrohem:
Së pari, thuhet se jam një punonjës i bashkisë Përmet.
Prej vitit 2021, unë Veli Mehmeti jam shkëputur nga marrëdhënia e punës me bashkinë e Përmetit për shkak të daljes në pension. Ky është fakt ligjor, i provueshëm dhe i njohur edhe nga gjithë komuniteti i përmetarëve.
Së dyti, thuhët se paskam shkuar në shtetin Grek, paskam mbledhur zarfet e votuesve të diasporës dhe paskam votuar unë për njerëzit në Greqi.
Është një fakt që verifikohet po aq lehtë sa edhe fakti i parë. Vajtja ime e fundit në Greqi ka qënë në muajin shkurt, muaj kur zarfet e diasporës nuk ishin shpërndarë akoma nga KQZ. Kjo verifikohet lehtë për nga sistemi TIMS.
Prandaj miq, se ku qëndron nevoja për të thurrur një shpifje kaq të trashë, të pabazuar në asnjë fakt apo provë, ju e kuptoni shumë mirë. Kjo akuzë e hedhur në hava nuk shpjegohet ndryshe përveçse strategjia e opozitës për alibinë për humbjen e rradhës duke shpikur armiq imagjinarë si në kohën idhullit të liderit të Jozefinës.
Këto përpjekie donkishoteske, më 12 maj do të marrin fund njësoj si në 6 palë zgjedhjet e fundit, kur i njëjti refren këndohet me të njëjtin ritëm.
Të fala nga Çarshova
